Iakynduh ki nonghikai NEHU ia u Lat ban pynkut ia ki jingeh ha ka skulbah

Syllad | The Rising MeghalayaNovember 8, 2024

Ki nonghikai hapoh ka lama jong ka North Eastern Hill University Teachers’ Association (NEHUTA) bad ka Meghalaya Tribal Teachers’ Association (MeTTA) ha ka 8 tarik u Naiwieng ki la kyntu ia ka jingtuklar lem jong u Lat ka Jylla u CH Vijayashankar uba dei ruh u Chief Rector jong ka skulbah NEHU ba un iarap lem ban pynkut noh ia ki kynrum kynram kiba dang iai bteng hapoh kane ka skulbah.

Kane ka la wan long hadien ba ka Skulbah NEHU ka la khangdam pura namar ka jingiakhih shah thngan ba khlem pud da ki samla pule ba la ialam da ka North Eastern Hill University Students’ Union (NEHUSU) bad ba la kyrshan da ka Khasi Students’ Union (KSU – NEHU Unit) halor ka jingpulom jong u Vice Chancellor u Prof PS Shukla ban weng kam shisyndon ia u Registrar bad u Deputy Registrar halor ka jingkynnoh ba ka jingthung ia ki ka long kaba beain.

Haba kren sha ki lad pathai khubor hadien ka jingialang, u president ka NEHUTA u Prof Lakhon Kma u la ong, “Ngi la iakren slem halor ki mat ba la wanrah da ka NEHUSU bad ka KSU-NEHU Unit lane ki Association jong ki nonghikai. Ngim pat poi sha kano kano ka jingpynbeit ia mynta hi hynrei ngi sngewnguh ia ka jingshim khia jong u Lat kum u Chief Rector ka NEHU namar u la pynthikna ha ngi ba un shim ia baroh ki lad ki lynti khnang ban pynphai biang ia ka jinglong jingman jong ka Skulbah kumba ka dei ban long.” 

“U Lat u la aijingmut ia ngi ban wanrah ia ki jingai jingmut ban pynkut noh ia kine ki jingiakhih kiba dang iai bteng. Kumta ngin leit biang bad iakren bad ki nonghikai kumjuh bad ka NEHUSU kaba lamkhmat ha kane ka jingiakhih shwa ba ngin wan biang sha u Lat,” ong u Prof Kma da kaba bynra, “Ngin sa wanrah ia ki jingai jingmut kiba donkam halor kumno ba ngin lah ban pynbeit ia kine ki jingeh. U la pynbna ia ngi kum u Chief Rector ban shim ia ki sienjam kiba kongsan.Ka jingsngewkhia kaba kongsan jong u ka long ba ki khynnah jong ngi kim dei ban shah thngan kumne namar ka long kaba sniew namar ka University ka dei na ka bynta jong ki bad lda kim don ma ki yn ym don mano mano ruh ki ban don.                Ki VC ki lah ban leit ban wan, ki nonghikai bad ki non-teaching staff ki lah ban leit ban wan, hynrei ka University ka dei ban sah bad ka dei ban long na ka bynta ki samla pule.”

U la ong ruh ba ki nonghikai ki sngewkhia shibun halor ka koit ka khiah jong ki khynnah pule namar ki la don hapdeng ka jingshah thngan lah 4 sngi mynta.

“U Lat u la iehnoh ha ngi ban aijingmut, kata nyngkong kumno ban pynkut noh ia ka jingshah thngan khnang ba ki samla pule kin lah ban leitphai sha la ki jong ki klas bad ha kajuh ka por ban wad ia ki lad ki lynti ba kyrkieh ban lah ban weng noh shwa ia ki jingeh.U la pynthikna ruh ban iakren bad baroh ki nongiashim bynta kynthup ia ki samla pule,” u la bynrap

Watla katta u Prof Lakhon Kma u la ong ba ki samla pule ki long skhem bha ha ka nongrim kaba ki ieng bad ka dei ruh kaba shong nongrim.

Haba pynrem ia ka jinglong mynthi jong u Vice Chancellor, u la ong, ‘Ngi tip kumno ki samla pule ki la poi sha une u pud naduh ba ki la kyrpad hiar shuki ia u Registrar bad Deputy Registrar bad mynta ban dawa weng syndon ia u VC namar ki la don hapdeng ka jingiakhih shah thngan lah 48 kynta hynrei um shym la leh ei ei.Ha ka jingshisha la kumno kumno u la dei ban pyni katto katne ka jingsngewkhia na ka bynta ki samla pule.