Iakynduh ki nongmihkhmat ki Harijan ia u CS, pynpaw ka jingbym hun pura halor ka jingthmu pynkynriah na Them Metor

Syllad | The Rising MeghalayaSeptember 26, 2024

Ki nongmihkhmat na ka Harijan Panchayat Committee (HPC) bad ka Shiromani Gurdwara Parbandhak Committee (SGPC) hadien ka jingialang bad u Chief Secretary ka Jylla u Bah DP Wahlang ha ka 25 tarik Nailur, ki la pynpaw ka jingsngew skhem ba shen yn lah ban weng ia ka jingeh ha kaba iadei bad ki 342 tylli ki longiing ha Them Metor, Iew Mawlong hashwa ban pyntreikam ia ka rai jong ka sorkar ban pynkynriah noh ia ki na kane ka jaka.

Haba kren sha ki lad pathai khubor, u nongialam ka SGPC u Jagmohan Singh u la ong, “Ngi la shong ia ka jingialang kaba seisoh bad ngi kyrmen ba ia ki jingeh kiba iadei bad ki longiing na Them Metor yn sa lah ban weng noh shen lane kham hadien.”

U la ong ruh ba kane ka mat ka dei kaba sngewkhia na ka bynta jong ki namar kine ki nongshong shnong kiba dei ki Sikh ki la wan naduh ki 200 snem kiba la leit noh na Punjab sha Meghalaya, bad na ka liang ka SGPC ruh ka la wan ban pynpaw ka jingiatylli na ka bynta jong ki.

“Ngim shym la wan shane ban thaw jingklumar. Ngi wan shane ban iarap ia ka sorkar ba kan lah ban weng ia ka jingeh bad ban ia pynbeit ha ka lynti kaba dei,” u la ong.

Ha kajuh ka por u la ong ruh ba ka kynhun kam shym la sngewhun pura bad dei na kata ka daw ki la pynpaw ia ki katto katne ki jingsngewkhia kiba dang don hapdeng ka jingiamir jingmut bad yn sa lah ban pynbeit ia ki khnang ban la lah shim ia ka rai kaba biang tam.

Ha kaba iadei bad ka jingbuh por ka sorkar ban pynkynriah ia kine ki longiing na Them Metor hapoh ka 31 tarik Nailur, u Singh u la ong, “U Symbud Myntri Rangbah ka Meghalaya u la aibor ha u Chief Secretary ban pynbeit ia kane ka kam, bad dei na kata ka daw ngi la wan iakynduh mynta ia une u heh sorkar.”

Haba kylli u Jagmohan u la kyntait ban batai ia ka jingmih na kane ka jingialang da kaba ong, “Kane ka jingialang ka dei ka bynta jong ka jingiakren kaba dang iaid shakhmat. Ngi la pynpaw ia ki jingsngew ki jong ngi bad ngim pat lah ban iathuh ei ei sha ki lad pathai khubor ia mynta hi.”