Iakynduh lang ki Myntri Tourism ki Jylla Mihngi bad Lammihngi ha Shillong ban kyntiew ia ki kam jngohkai

Syllad | The Rising MeghalayaSeptember 3, 2024

Ka Jylla Meghalaya ha ka 2 tarik Nailur ka la khot pynlong ia ka jngialang jong ki Myntri kam jngohkai (Tourism) ki Jylla ka thain Shatei Lammihngi bad Mihngi / Union Territories ha ka sienjam kaba kongsan ban iatreilang na ka bynta ban kyntiew ia ki kam jngohkai pyrthei hapoh ka thain Mihngi bad Lammihngi kynthup hapoh Andaman bad Nicobar Islands.

Kane ka jingialang kaba thmu ban iasam ia ki jingshemphang bad ki sienjam kumno ban kyntiew ia ki kam jngohkai pyrthei ka la walam ia ki nongmihkhmat bad kiwei pat na ki jylla jong ka thain Mihngi bad ka thain Shatei Lammihngi kumjuh napoh Andaman bad Nicobar Islands. Ka la don ruh ka jingpynshai na ki nongmihkhmat na kine ki jylla halor ki kam jngohkai bad ia ki jingthmu ban nangkyntiew shuh shuh hadien habud.

U Gajendra Singh Shekhawat Myntri kam jngohkai ka sorkar Pdeng haba kren ha ka jingialang u la ong, “Nga dei ban sngewnguh ia ka jingangnud jong ki Jylla. Kawei pa kawei ka jylla ka la buh ia la ka jong ka thong.” U la ong ruh ba ki jylla ki la buh ia la ki jong ki thong bad pyrto ruh ia ka mynsiem iakhun hapdeng ki jylla.Hadien ki jingpynpaw da ki nongmihkhmat ki jylla u la ong ba kane ka dei kawei n ki jingialang kaba biang tam kaba u la leit ban iashim bynta kat haduh mynta.

Na ka liang u Myntri kam jngohkai ka Jylla u Bah Paul Lyngdoh ha ka jingkren u la pynpaw ba ka Jylla Meghalaya ka dei kaba la kyrkhu kyrpad lyngba ka jingdon ia ki jaka kiba itynnad kiba khring shibun ia ki nongwan shangkai na kylleng, bad ka dei ruh ka jaka kaba don ia ki krem kiba phylla, kata kynthup ia ka kam Mawmluh kaba la ithuh da ka UNESCO bad kaba khring shibun ia ki kynhun nongrung krem na kylleng ka pyrthei.

“Ka kam jngohkai pyrthei ka dei ka kam kaba ar kaba pynmih kam bad aikam ai jam ha ka jylla Meghalaya, bad ka jingthmu jong ngi ka long ban pynkylla ia ka Jylla jong ngi sha ka jaka jngohkai kaba ka India ka kham jied,”ong u Paul Lyngdoh.

“Hynrei kane ka wanrah ruh shibun ki jingeh ia ka jylla. Ki jaka jngohkai ba pawnam ha Meghalaya ki ju wan jngohkai da ka jingbun ki nongjngohkai pyrthei kaba buh ka jingkit kaba khia ïa ki spah mariang jong ka Jylla. Kane ka jingbym iahap ka nang jur shuh shuh namar ka jingduna ka jingpyniasoh bad ka jingbym biang ki jingtei, kum ki jaka sah, ki jingdonkam ha kiba bun ki jaka jngohkai pyrthei. Ban weng ia kine ki jingeh, ka sorkar ka kwah ban kyntiew ia ka kam jngohkai pyrthei kaba neh bad kaba don ka jingkitkhlieh, ban ioh ia ka jingsam mar katjuh ia ki nongjngohkai pyrthei ha kylleng ka jylla bad ban kyntiew ia ki jaka leit jingleit kiba thymmai. Kumta, ka jylla ka iatreilang bad ki nongiashim bynta ha ka kam jngohkai pyrthei, kynthup ia ki nongshong shnong, ki nongkhaii bad ki paralok ha ka kam jngohkai pyrthei khnang ban thaw ia ka lynti kaba iatylli sha ka jingroi kaba neh bad kaba kynthup lang.,” u la ong.

Ha kine ki khyndiat  snem ba la dep ka Meghalaya ka la paw bha kum ka jaka jngohkai kaba itynnad ha ka map shang pyrthei. Kat haduh u snem 2023, ka kam jngohkai pyrthei ha Meghalaya ka la lah ban aikam ai jam ia haduh kumba 50084 ngut ki nongshong shnong katba ka jingbei tyngka ka la kynjoh sha ka T.465 klur ha kine ki lai snem ba la dep. Shwa ka jingwan jong ka khlad Covid-19, ka kam jngohkai pyrthei ka la mad ia ka jingkiew kaba haduh 7.34 percent shi snem bad ia kaba la khmih lynti ba kan nanglah ban kiew shuh shuh ha kine ki san snem ki ban wan.

Ka kam jngohkai pyrthei ha Meghalaya ym tang ba ka la kyntiew ia ka ioh ka kot jong ka Jylla hynrei ka la plie ruh ia ki lad ai kam ai jam kaba la kot shaduh 50000. Nalor kata ka Meghalaya ka la pynleit jingmut ruh halor ki kam jngohkai ki ban neh ha kaba ki jingthmu ba kongsan kum ka Community-Led Tourism Infrastructure Development Scheme, ka jingkyntiew ia ki kam jngohkai kumjuh halor ka rukom pynjanai ia ka rukom lum ia ki jaboh jabain.

Nalor kata ka Meghalaya Grassroots Music Project (MGMP) ruh ka don ia ka bynta kaba kongsan ha kaban kyntiew ïa ka kam jngohkai pyrthei ha ka jylla Meghalaya. Ka MGMP ka iaid palat ia ka jingput jingtem namar ka pynroi ia ka ioh ka kot kaba thymmai, kaba pynkupbor ia ki nongput nongtem bad ka jinglong tynrai jong ka kolshor kaba pyni ia ka pateng ba kyrpang jong ka Meghalaya ha ka rynsan kaba kham heh kaba khring ia ki nongjngohkai pyrthei bad ki nongbei tyngka.

Shuh shuh ha kane ka prokram la sakhi ruh ia ki jingiakren jong ki Myntri kam jngohkai pyrthei jong ki jylla ka thain Shatei Lam Mihngi bad Mihngi bad u Gajendra Singh Shekhawat. Ki riew pawkhmat kiba la iadonlang ha kane ka jingialang ki kynthup ia u Suresh Gopi, Myntri Khynnah ka Ministry of Tourism, u Suman Billa, IAS, Additional Secretary Ministry of Tourism, ka Mugdha Sinha, IAS, Director General ka Ministry of Tourism jngohkai pyrthei, Bah Cyril VD Diengdoh Director ka tnad Tourism nalor kiwei pat.