Iakynduh u CS ia ki samla pule NEHU; kyntu ban sangeh ia ka jingshah thngan katba dang iaid ka jingtohkit

Syllad | The Rising MeghalayaNovember 20, 2024

U Chief Secretary ka Jylla u Bah DP Wahlang ha ka 19 tarik u Naiwieng u la leit iakynduh ia ki samla pule ka skulbah North Eastern Hill University (NEHU) kiba pynlong jingiakhih bad kyntu ba kin sangeh shipor ia ka jingshah thngan ba khlem pud jong ki katba ka jingtohkit da ka Inquiry Committee ka dang iaid shakhmat.

Ha kane ka jingleit la synran lang ia u Chief Secretary da ka Director General of Police (DGP) ka Jylla ka Kong Idashisha Nongrang bad ka Deputy Commissioner ka East Khasi Hills, ka Kong RM Kurbah.

Haba kren sha ki lad pathai khubor, u Bah DP Wahlang u la ong, “Ngi wan hangne tang halor kawei ka jingthmu, bad kata ka long ban kyrpad ia ki samla pule ba kin sangeh shwa shipor ia ka jingiakhih kat bym pat dep ka jingtohkit.”

“Nga la iakren bad baroh ki samla pule ba pynlong jingiakhih bad nga la pyntip sha ki halor ka daw balei ba ki dei ban pynsangeh shwa ia kane ka jingiakhih ka jong ki,” u la bynrap. Nga sngewskhem bad nga kyrmen ba kin shong lang bad ki seng bapher bapher kiba iakhih bad kin pynsangeh noh katba ka jingtohkit ka dang iaid. Nga la wan hangne na ka bynta ka Sorkar Jylla bad kumjuh ruh ha ka bor shimet, ma nga bad ka DGP kumjuh,” u la bynrap.

Hadien ba la shimti kum u Vice Chancellor In-Charge ka NEHU, u Prof Nirmalemdu Saha u la pyntip ba u la thung ia ka Inquiry Committee ka ban pynlong ia ka jingtohkit ia ki jingkynnoh bad ia ka kaiphod jong kane ka Committee yn sa aiti sha ka Inquiry Committee ba thung da ka Ministry of Education.

Na ka liang u Saha ruh u la kyrpad ia ki samla ba pynlong jingiakhih ba kin pynkut noh ia ka jingshah thngan ka jong ki kaba la iaid mynta lah 15 sngi.

Ki samla pule ka NEHU hapoh ka lama jong ka NEHU Students Union (NEHUSU) bad KSU-NEHU Unit, kila bteng ia ka jingshah tngan ba khlem pud kaba la iaid mynta 15 sngi ban dawa hiar shuki ia u Vice Chancellor ka NEHU u Prof PS Shukla bad ban weng kam mardor ia u Registrar bad Deputy Registrar.

Hynrei wat hadien ba ka Ministry of Education ka la thung ia ka Inquiry Committee kaba kynthup ia arngut ki dkhot ban tohkit ia ki jingkynnoh pyniaid kam bakla bad jingbym lah treikam ki bor pyniaid ka NEHU, hynrei na ka liang ki samla pule kila bteng beit  ia ka jingiakhih halor ka nongrim ba dei ban weng kam shuwa ia u VC u Prof PS Shukla.