Iakynduh u Myntri ia kiba haiing jong ki lanot twa khyndew ha Nongpriang; aijingiarap mar T.4 lak

Syllad | The Rising MeghalayaJune 2, 2024

U Myntri ka sorkar Jylla uba khmih ia ka Tnat Revenue and Disaster Management u Bah Kyrmen Shylla ha ka 1 tarik Jylliew u la pynlong ka jingleit jurip sha ka shnong ba la jia ka jingtwa khyndew ha Nongpriang, Shella-Bholaganj C&RD Block bad iakynduh ruh ia kiba haiing hasem jong ki sawngut ki lanot kiba la khlad ha kane ka jingjia.

Ha kane ka jingiakynduh ia kiba haiing hasem kiba dang don hapdeng ka jingsngewsih kthang halor kane ka jingduh noh ia ki sawngut ka longiing, na ka liang u Myntri u la pynpaw ka jingsngewlem bad pynthikna ruh ba na ka liang ka sorkar kan ai ka jingiarap bad ka jingkyrshan na ka bynta jong ki.

U Myntri u la ong, “Ka jingthmu jong kane ka jingleit jngoh ka long ban pynpaw ka jingsngewlem na ka bynta kiba haiing hasem jong kine ki lanot. Ki kynhun jong ngi ki la pyrshang borbah ban lapdien ia ki metiap, bad la ioh jingtip ruh ba la lah ban sei noh sa ia ki artylli ki metiap ha ka sngi Thohdieng ba la lah. U Myntri u la aiti ruh ia ka song jingiarap pisa kaba mar T.4 lak sha kiba haiing hasem jong kine ki lanot.

Haba ai ia ki kyntien  pynshlur bad aimynsiem ia ki nongshong shnong ka Jylla hadien ki jingjia shah pynjulor namar u Cyclone Remal, u Bah Kyrmen u la ong, “Baroh ki dei ban long kiba peitngor namar ka jylla jong ngi ka dei kaba shah ktah bha na ki jingjia shah pynjulor mariang. Long kiba husiar bad pynkhreh. Kum ki nongshong shnong kiba dei ki nongiarap kiba nyngkong, kumta ruh phi dei ban long kiba pynkhreh tad haduh ba ki tnat sorkar kin wan poi namar ka lah ban shim kumba katto katne por ban poi sha ki jaka ba jia ki jingshah pynjulor khamtam sha kito ki jaka kiba kham pajih. Ngi la iohi ruh ia ka jingkyrshan jong ki nongshong shnong ha Nongpriang.”

Nalor kata u Myntri u pyntip ruh ba ka jingleit jurip sha kiwei pat ki jaka ruh kan dang bteng bad na ka liang ka sorkar kan ai ruh ia ki lad jingiarap sha kito ki briew kiba la shah ktah ha kane ka jingjia.

Na ka liang u MLA ka Sohra u Bah Gavin Mylliem uba la synran lang ia u Myntri u la ai khublei ia kane ka jingwan jngoh bad jingai jingiarap jong u Myntri sha kiba haiing hasem jong kine ki lanot. U la ong ba kane ka pyni ba ka sorkar ka don ryngkat lang bad ki paidbah.