Ialam leit jngoh CM ia ka kynhun ki nongrep bad nongsengkam sha Rashtrapati Bhavan

Syllad | The Rising MeghalayaJuly 18, 2024

U Myntri Rangbah ka Jylla u Conrad K Sangma u la ialam ia ka kynhun ki nongrep bad ki nongsengkam ka Jylla kiba iashim bynta ha ka Tamasa Sohtrun ba dang shen ha New Delhi shapoh Rashtrapati Bhavan.

Kane ka jingleit jngoh ka pynskhem ruh ia ka jingkut jingmut jong ka sorkar Jylla ban pynneh pynsah bad kyntiew ia ka bha ka miat jong u budlum ka ioh ka kot ka Jylla kiba dei ki nongrep.

Kane ka kynhun kaba u CM u la ialam ia ki 19 ngut ki nongrep bad 10 ngut ki nongsengkam ka Jylla ki kynthup ruh ia u Bah CVD Diengdoh, IAS Secretary, ka Tnat Planning ka sorkar Jylla, I Majaw, Joint Secretary, ka tnad Bording, Alexander Mukhim, Deputy Secretary, Anita Kharpor, Joint Secretary, bad ka Kong I Diengdoh, Joint Mission Director, SRES.

Lyngba ka jingpyntreikam ia ki jingiarap lyngba ki mishon hapoh ki shnong ki thaw, ki polisi jong ka sorkar Meghalaya kila aijingmyntoi shibun ia ki nongrep bad ki nongseng kam ka Jylla ha ki kyrdan bapher bapher.

Hadien ka jingseisoh jong ka Tamasa Sohtrun ne “Pineapple Festival 2024,” kaba ar kaba la long dang shen ha New Delhi, kane ka jingleit jngoh shapoh Rashtrapati Bhawan ha ryngkat ki nongrep bad nongsengkam ka pyni ia ka jingthmu jng u CM ban pynkupbor ia u budlum jong ka ioh ka kot kiba dei ki nongrep bad ki nongsengkam jong ka jylla.

Na ka liang u Myntri Rangbah u la ong, “Ka sorkar Meghalaya barabor ka ju iatreilang ryngkat bad ki nongrep kiba long u budlum jong ka ioh ka kot ka Jylla. Kane ka long ruh hadien ka jingjop jong katei ka tamasa Sohtrun, kata ym tang ba ka ithuh ia ka jingtrei shitom ka jong ki hynrei ka pynshlur ruh ia ki ba kin kiew shaphrang.

Ha kane ka jingleit jngoh, u Conrad u la kren ruh halor ka jingiatylli jong ka jaidbynriew, kaba pyni ruh ba ka jingdon jong ki nongrep na ka Jylla hapoh Rashtrapati Bhawan ka long ka jingsarong bad kaba pyni ia ka jingiatylli jong ka jaidbynriew.

Lah ban kdew ba ki nongrep ka jylla ki la pynlong ruh ka jingleit jngoh ia ka ‘Janjatiya Darpan’, kaba dei ka art bad kolshor jong ki riewlum ha Rashtrapati Bhawan ia kaba la plie da ka President ka Ri India ka Droupadi Murmu kaba ia lade ruh ka dei na ka jaidbynriew riewlum. Kine ki nongwan jngohkai ki la pynpaw ruh ka jingkmen ban iohi ia ki jingshna bad ki jingdeng ryndang jng ki jaidbynriew Khasi bad Garo ka Meghalaya ia kiba la pyni ha katei ka jaka. Nalor kata ka la don ruh ka jinglum jingtip ia kine ki tiar ha ryngkat kiwei pat ki jingthoh shaphang ki jaidbynriew hapoh ka ri India.

Kine ki nongrep kiba la leit jngoh ia ka Rashtrapati Bhawan ha ryngkat u CM ki la pynpaw ia ka jingkmen halor kine kiei kiei baroh. “Ka Tamasa Sohtrun” ka Meghalaya ka la plie ia ki lad bathymmai na ka bynta jong ngi, bad ka jingioh leit jngoh ia ka Rashtrapati Bhawan ka dei ka jingphohsniew kaba la wan urlong.”

U Myntri Rangbah barabor u ai ka jingkyrshan na ka bynta ki nongrep. Dei lyngba ka jingtrei borbah ka jong ngi ba ki Sohtrun jong ngi mynta la lah ban shalan wat sha kiwei pat ki ri ka pyrthei,” ong ka ong ka kong Badashisha Lapang, ka nongrep ka jylla. Uwei pat u nongrep ula ong, “Kane ka jingioh mad ka long kum ka jingpynshlur ia ki bad da ka jingsynran lang jong u CM ka Jylla sha ka Rashtrapati Bhawan, kala pyni ba ia ka jingtrei shitom jong ngi la khein kor bad ithuh ha ka kyrdan kaba ha khliehduh.”

Na ka liang u Bah Cyril VD Diengdoh, Secretary ka tnad Planning u la pynpaw ia ka jingkut jingmut jong ka sorkarJylla ban kyntiew ia ka rep ka riang. U la kdew ruh ba “Kane ka jingleit jngoh ka pynpaw ia ka jingkut jingmut jng ka sorkar ban pynshlur ia ki nngrep ba kin wad shuh shuh ia ki lad ki lynti na ka bynta ban pyniar shuh shuh ia ka kam.”

Ka jingpyrshang jong ka Sorkar ban kyntiew bad pyniaid iew ia u sohtrun ryngkat bad kiwei kiwei ki mar rep jong ka jylla kala pynlong ia ka jingshalan kaba jop shabar ri bad ia ki mar rep bapher bapher sha ki bynta bapher bapher jong ka pyrthei. Dang shen, ka jylla ka la shalan haduh palat 3.5 Ton u Sohtrun sha ki ri ka thain Middle East, ka jingjop jong ki jingïarap ha ka rukom treikam da ka Sorkar.

Kumjuh na ka liang ki nongseng kam sengjam ruh kila pynpaw ia ki jingsngew. “U Myntri Rangbah uba la synran ia ngi ha ka jingleit jngoh ia ka Rashtrapati Bhavan, la pynskhem biang ia ngi ba ka jingkyrshan na ka sorkar jong ngi kan iai bteng. Ka pynshlur ia ngi ban wanrah ia ki jingpynwandur bad pynheh ia ki jingtreikam jong ngi,” ong ka Robina J Sangma, kawei na ki nongseng kam   na ka PRIME (Promotion and Incubation of Market Driven Enterprises), Meghalaya.

Kumta ruh kane ka jingleit jngoh ia ka Rashtrapati Bhavan kala pyni ia ka jingleh jong ka Sorkar Meghalaya ia ka jingpyrshang ban bteng ha kaba pynkupbor ia ki briew naduh ki shnong ki thaw bad ban wad ia ki jingpyrshang kiba thymmai bad ia ki lad ki lynti na ka bynta ka jingroi ha ka liang ka ioh ka kot.