Ïalap elekshon MDC ki 6 ngut ki kyrtong shi jaka ha Jowai
JOWAI: Ki kyrtong MDC jong ka Jowai South Constituency ki la pynpaw ïa ka jingmynjur jong ki halor ka jingduna nongialam ha Jaiñtia Hills Autonomous District Council (JHADC) bad ka jingma kaba ap ïa ka jaidbynriew lada ka la urlong ka Citizenship Amendment Bill (CAB), 2016.
Ki kyrtong ki la pynpaw ïa kane ka common platform bala pynlong da ka Dorbar Shnong Khimusniang mynta ka janmiet ha phyllaw jong ka inddor hall.
![](https://www.syllad.com/wp-content/uploads/2024/09/JIT-Vacancy-823x1024.avif)
U MDC United Democratic Party (UDP) jong ka Jowai South u Ma Moonlight Pariat u la ong ba u la rai ban ïakhun biang ïa kane ka elekshon namar ba u dang angnud ban pyndep ïa ki kam kiba sah teng haduh mynta bad hadien ka jingmynjur jong ka Sorkar Kmie ban pynkylla ïa Sixth Schedule jong ka Constitution jong ka Ri India, ka jingkyrmen ka ap ïaka konsil ban wanrah ki kam pynroi.
U la buh ia ka jingkyrpad kaba rit jong u ha khmat ki paidbah jong ka shnong Khimmusiang bad Constituency ban ai lad biang ia u ban long u nongmihkhmat jong ki bad pyndep ïa ïaka iew thymmai jong ka konsil bad ban pynbha ïaka jingtreikam ka konsil ban wan ka roi ka par salonsar.
U Kyrtong jong ka NPP U Ma Saron Pasweth u la ïathuh ba lada kam dei na ka jingtreishitom jong u Conrad Sangma ka District Council ka la jan duh ha kane ka por ba pynmih ia ka ain Citizenship Amendment Bill (CAB) 2016 da ka sorkar BJP hynrei da ka jingshimkhia u Conrad ka BJP ka la pyndam noh ia ka CAB.
U la iathuh ruh ïa ki paidbah ba ka Sorkar Kmie ka la pynkylla kyrteng noh ia ka Autonomous District Council sha ka Territorial District Council bad u la kular ban pynkiew ia ka bhah jong ka district council na ka jinglum khajna marpoh khyndew.
U kyrtong shimet u Ma RK Ram Rymbai ula ïathuh ba ka Sorkar BJP da ka jingthmu ban wanrah ia ki Hindu na Afghanistan, Bangladesh bad Pakistan sha Ri India lyngba ka ain CAB bad kane kan buh ia ka jingma kaba khraw ia ka jaidbynriew rit paid, hynrei donbok ba katei ka aiñ ka la ïap noh mynta.
U la ther tyngeh ia ki MDC jong ka JHADC kim bym shna aiñ ban iada ia ka jingshong khleh bad ia ka kam khaii pateng hynrei ki don por ban shna ain ban pynkiew tulop ialade wat haba ym don pisa ka Council bad kane ka pynpaw shai ia ka jingduna nongialam ne leadership ha JHADC.
U kyrtong shimet u Ma Pil Khyriem ula ther tyngeh eh halor ka jingai NOC pathar ia ki karkhana bad ia ka Toll Gate ha 7 Mer kaban sa wanrah ia ka jingeh ia ki nongshong shnong ka Ri Lum Jaintia namar kin hap siew khajna bad halor ka jingbun jong ki mynder ri ha Ri Lum kaba lah wanrah ia ka jingduh kam duh jam ia ki trai shnong.
U la bynniaw ruh halor ki jinglum pisa beain da kaba ong ka jingkhublei kti ha surok ka sdang naduh Khanapara bad kut shaduh Ratacherra.
U Kyrtong jong ka INC Bah Baitlang Pohsngap u la kop ba ka dei Congress party kaba la pynduh pyndam ïa ka CAB kaba la wanrah da ka sorkar BJP. U la ong ba u ieng pyrshah ia ka jingpyndonkam pisa ha ka elekshon namar u thmu ban pynlong ia ka eleshon kaba khuid kaba suba.
U kyrtong shimet U Bah Dunno Nongpluh ula pynkynmaw halor ka jingnohsynniang jong u sha ka JHADC ha ka por ba long Executive Member bad u la kular ban pynbeit ïaka jingphiah constituency abd ka jingtreikam ka konsil.
Leave a Reply