Ialap pynsngewthuh paidbah ka synjuk ki Muster Roll iaki skhim bad lad jingiarap iaki nongtrei bylla

Syllad | The Rising MeghalayaOctober 4, 2020

Ka All Jaiñtia Muster Roll Workers & Labour Union ha ryngkat ka Self Help Group (SHG) jong ki nongtrei Muster Roll bad Mid Day Meal (MDM) Cook na ka Shnong Mihmyntdu ki la pynlong ka jingialang haka 3 tarik Risaw ha Lumpyrdi, Mihmyntdu ban pynshai paidbah iaki skim ban myntoi ki nongtrei bylla sngi..

Ka jingthmu jong katei ka jingialang ka long ban pynsngewthuh ïaki lad jingmyntoi ba ïoh lyngba ka Meghalaya Building and other Construction Workers Welfare Board jong ka sorkar Jylla kumjuh ka Pradhan Mantri Shram Yogi Maan-dhan (PM-SYM) ne ka Pension Scheme kaba iarap iaki briew kiba trei bylla bym thikna ka kamai ka kajih.

Ïaka jingialang la pyniaid da ka Kong Susan Dkhar Chairperson SHG bad la ioh ka jingbatai na u K L Pariat President bad ka Kong D Ïakai VP AJMWLU kiba la batai iaki lad jingmyntoi ba ki nongtrei Muster Roll ki lah ban ïoh lyngba ka tnad PWD/PHE kumjuh ka MBOCWB bad PM-SYM.

Ha katei ka jingialang la don 20 ngut ki nongtrei misteri na ka Shnong Mihmyntdu kiba la pynrung kyrteng haka MBOCWB.

Ka AJMWLU ka kyntu ia baroh ki nongbylla ban pynrung kyrteng haka PM-SYM khnang ba kin ioh ka jingkyrshan pisa man u bnai bad ban shim ruh ka jingiarap na ka MBOCWB kaba ioh lyngba ka tnad Labour jong ka sorkar Jylla.

Ha katei ka jingialang la donlang ka Kong M. Bareh General Secretary ka seng AJMWLU, u Ma D. Bthuh Vice President, u Ma D. Suchiang Jowai Polytechnic Muster Roll Workers Union bad ka Kong K. Ryngkhlem Treasurer ka SHG Mihmyntdu.