Iamih paidbah haka 12 tarik u Nohprah ban pyrshah ïaka jingpynkylla ïaka Sixth Schedule

Syllad | The Rising MeghalayaNovember 9, 2019

KHLIEHRIAT: U nongiasaid ain jong ka jylla u Bah Erwin Sutnga u la iawer ban ia mih paidbah ha ka 12 tarik Nohprah  mynta u snem ha Shillong ban dawa ban nym wanrah ki jingkylla ha ka Sixth Schedule jong ka Constitution jong ka Ri India kiban ktah ia ka bha ka miat jong ka ri bad ka jaidbynriew.

“Ka Sorkar kmie kan dang pynkhreh ban pynkylla ia ka Sixth Schedule bad ka thmu ban pynrung ki jingpynkylla kiba yn pyntlot ia ka Sixth Schedule bad thung ruh ia ka komiti kaba kyrpang ban twad jingmut na ki briew bad kumta ngi donkam ban pynsngew ha khmat katei ka komiti,” ong U Bah Sutnga ha ka jingialang paidbah kaba la khot pynlong da ka Jaintia Amalgamated Redressal Forum (JARF) kaba la long ha Madan Phutbol, Tuber Sohshrieh, East Jaintia Hills District mynta ka sngi.

U Bah Sutnga u la iathuh ba ka Sorkar Kmie ka la pynkhreh ban wanrah ia ka Uniform Civil Code haba yn don kawei ka ain ka kanun ha ka Ri India bad ka Citizenship Amendment Bill bad kine baroh kin sa ktah ia ka bha ka miat jong ka ri bad ka jaidbynriew.

U MDC jong ka Seng Bharatiya Janata Party (BJP) na ka Nangbah Constituency u Ma Lakhon Biam u la iathuh ba ha u snem 2014 ha ka por ba ka khang tih dewiong ka NGT u la pynmih kawei ka jingthoh ha kot khubor ban pynpaw ia ka jingsngewpyrshah jong u watla ha katei ka por u dang trei kum u SDO PWD.

U la iathuh shuh shuh ba u snem 2017 u la pynmih sa kawei ka jingthoh ia kaba u la ai kyrteng “Mano ba long trai ia u dewiong” ha Mawphor haba u la batai ba ia u dewiong ha baroh kawei ka Ri India la long trai da ka Sorkar Kmie lait noh ha Meghalaya namar la pynlait da ka Sixth Schedule.

U MDC jong ka Seng BJP u la iathuh ba “ngin sa wanrah ia ka resolution ha ka Dorbar Tlang ha JHADC ban dawa ia ka jingpynbeit mardor ia ka jingeh ki paidbah kaba mih na ka jingkhang tih dewiong” bad kumta u la iawer ia ki nongialam seng bhalang bad ki riew paidbah bad ki dei ban leit sha la ki MDC ban kyrpad ia ki ban kyrshan ia ka resolution jong ki.

U nongiasiad ain jong ka thain u Ma Kerlang Ksoo u la iathuh ba ka jingrai jong ka Supreme Court kaba la mih ha ka 3 tarik u bnai Naitung mynta u snem ka weng noh ia ka jingkhang tih dewiong ha ka jylla Meghalaya hynrei ryngkat bad ki kyndon kiba tyngeh.U la ong ruh shuh shuh katei ka hukum jong ka Supreme Court ka la pynjari ia ka Mine and Minerals (Development and Regulation) Act 1957 ha ka jylla Meghalaya bad kane ka Act ka buh ki kyndon kumno ban tih dewiong bad kumta ter ter.

Kiwei kiwei kiba la ai jingkren ha katei ka jingialang ki long u General Secretary ka JARF u Ma Leningstar Rymbai, u Chief Executive Member barim jong ka JHADC u Ma Obil Kyndait, u President jong ka KSU Jaintia Hills u Ma Ohibait Dkhar, ka Deputy Chairperson barim jong ka JHADC ka Kong Violet Lyngdoh, U President jong JHTOA U Ma Nidamon Chullet bad kiwei de katba u President jong ka JARF u Ma Helping Phawa u la pyniaid ia ka jingialang bad u Bah Dunno Nongpluh u la ai kyntien khublei.

Ha katei ka jingialang la shim ia ka rai ban leit dawa na ka JHADC ban ujor da ka Review Petition pyrshah ia katei ka jingrai jong ka Supreme Court bad kumjuh ruh ban leit dawa na ka Sorkar Jylla ban shna noh mardor ia ka mining policy khnang ban plie lad plie lynti ia ki paidbah ban tih dewiong.