Iamir jingmut ka AEEE bad ka Barefoot Trust halor ki jingeh ban pyntreikam ia ki kali bording ha Meghalaya

Syllad | The Rising MeghalayaOctober 30, 2023

Ka jingiakren halor ka jingpyrshang ban pyntreikam da ki kali ba pyniaid da ka bording ilektrik ne ki Electric Vehicles (EV) ha ka jyllaMeghalaya ka la iaid shakhmat watla ki kynhun kiba iadon bynta ki la pynpaw ia ka jingshem jingeh ban poi sha kane ka thong.

Na ka liang u Bibhudutta Sahu, Consultant ka Alliance for an Energy Efficient Economy (AEEE) u la iathuh ba ia kane ka jingiakren la pynlong dang shen ha kaba ki nongkhot jingialang ki la shim ia baroh ki sienjam ban pyniadon bynta lang da ki kynhun na ka liang ka sorkar bad ki kynhun shimet.

Ia kane ka jingiamir jingmut hapdeng ki kynhun kiba iadon bynta halor ka Meghalaya EV Policy bad halor ki kam bei tyngka la khot pynlong da ka Tnat Transport ka sorkar Meghalaya bad ka AEEE ban iamir jingmut halor ka jingtyrwa ban pyntreikam ia ki kali bording (EV) ha ka jylla ka ban iada ruh ha kaba iadei bad ka khuid ka suba ha ka mariang.

U Sahu u la ong; “Kane ka rynsan ka la plielad ia ki halor ki jingtip kiba donkam kiba iadei bad ki jingeh kiba yn iakynduh ban pyntreikam ia kane ka sienjam.” “Ngi don ia ki jingthmu ban pynbeit halor kine ki jingeh bad ban lah ban weng ia ki khnang ban plielad ia ki nongshong shnong ka Meghalaya.Ngi kyrmen skhem ba na ka liang ka sorkar Meghalaya kan pdiang ia kane ka jingai jingmut ha kaba iadei bad ka EV policy ryngkat ka jingiatreilang bad ki kynhun trai shnong na ka bynta ban ai ka jingpynshai paidbah,” u la ong shuh shuh.

Na ka liang ka AEEE bad ka Barefoot Trust ki la sdang ruh ban wanrah ka jingiadei bad ki tnat bapher bapher ha ryngkat ki  sngewthuh ia ki jingeh bad ban plie ia ki sienjam kawei hadien kawei bad ban pyrshang ban pyntreikam shwa tang kum ka nuksa tang ha ki katto katne ki bynta.Lah ban kdew ba ha ka 18 tarik Risaw, ka Tnat Transport ka Meghalaya ryngkat ka jingiatreilang bad ka AEEE dang shen ki la khot pynlong ia ka jingiamir jingmut halor ka Meghalaya EV policy ia kaba la pynlong ha Taj Vivanta.

Ha kane ka jingialang iamir jingmut u Dr. Vikas Nimesh na ka AEEE u la kren halor ka Meghalaya EV policy da kaba kdew halor ka jingdonkam ban wanrah ia ki jingkylla, kata ki ban kynthup ruh halor ka jingpynkylla ia ki kali rim sha ki kali ba lah ban pyniaid da ka bording ilektrik.

Na ka liang u      Prof. Prabha Shankar Shukla, Vice-Chancellor ka NEHU ruh u la aijingmut ban pyntreikam ia kane ka sienjam ha Meghalaya, kata da kaba pynpaw ruh halor ka jingshaniah tylli jong ka India ha ki mar umphniang wat hadien ba ki ri ka pyrthei ki la sdang ban phaikhmat sha ki EVs.

Na ka liang ki nongiashim bynta ki la pynpaw ruh ba ka jinglah ban pyntreikam da kine ki kali bording ha ki por ki snem ki ban dang wan kan lah ban pynneh pynsah ia ka jingkhuid jingsuba ha ka mariang bad kyntiew ruh ha ka liang ka ioh ka kot lyngba ka jingpynmih jong kine ki karkhana treikam ne ki EV infrastructure, ki charging network development bad ha kiba bun kiwei pat ki bynta.