Iamir jingmut ka Health Experts Committee ban iakhun pyrshah ia ka jingma na ka jingpang HMPV

Syllad | The Rising MeghalayaJanuary 8, 2025

Ka Health Experts Committee jong ka Tnad ka koit ka khiah ka Jylla Meghalaya ka la lum ia ka jingialang ha ka 7 tarik Kyllalyngkot hapoh ka jingpyniaid u Principal Secretary ban iamir jingmut ha kaba iadei bad ki jingma halor ki khubor jong ka jingpang Human Metapneumovirus (HMPV).

Ka Committee ka la bishar bniah ia ka jingma kaba don mynta bad bishar bniah ruh halor ki jingpynkhreh jong ka Tnad ka koit ka khiah ban iakhun pyrshah ia une u khniang jingpang.

Ka Committee ka la ong ba u HMPV um dei satia u khniang jingpang uba thymmai hynrei u dei uba la saphriang hapdeng ki paidbah la bun snem mynta naduh ba la lap ia u ha u snem 2001.

Ha u bnai Nohprah 2024 ki la don tang 9 tylli ki case ba la pynthikna shah ktah ha une u khniang jngpang HMPV napdeng ki 714 ngut ki briew ba suba shah ktah ha une u khniang jingpang HMPV hapoh ka ri baroh kawei ha kaba kam shym la don ruh kano kano ka jingiap briew.

Kane ka jingpang ka pyni ia ki dak ka jingshem shitom ha kaba ring mynsiem bad kaba iasyriem bad ka jingpang flu, kata kum ka jingpang shit, jyrhoh, tyrkhong ryndang bad ka jingtuid eitmut.

Ki dak ki shin ki long kiba jem bha bad ym shym la don kano kano ka jingiap namar ka jingpang HMPV. Ki jinglong ba mynta ki iadei bad ki jinglong jong ka aiom bad kim pyni ia ka jinglong kaba pher ne kaba pynkhihwin.

Haba pynmih ia ki jingai jingmut sha ki paidbah, ka Committee ka pynshlur ia ki paidbah ba kin bud ryntih ia ki kyndon ba kongsan jong ka jingkhuid jingsuba, kata kum ka jingsait kti kaba khah khah, ka jingdeng ia ki mask lada ki don ia kino kino ki dak kiba iasyriem bad ka jingpang flu khnang ban pynduna ia ki jingma na ki jingshitom kiba ktah ia ka jingring mynsiem.

Ka Integrated Disease Surveillance Programme (IDSP) kan iai bteng ban buddien bha ia ka jinglong jingman bad kan khmih bniah ban pynthikna na ka bynta ka koit ka khiah bad ka jingshngain jong ki paidbah ha kane ka aiom.Ka tnad ka koit ka khiah ka jylla ka la long kaba la pynkhreh bha bad pynkhlain bha na ka bynta ban ialeh pyrshah ia kino kino ki jingeh kiba lah ban mih bad saphriang na kane ka jingpang, bynrap ka Committee.