Iamir jingmut ki Tnat Sorkar bad ki Dorbar Shnong ban iatreilang ha ka thma pyrshah drok

Syllad | The Rising MeghalayaJune 8, 2024

Ka Tnat Social Welfare ka sorkar Jylla ha ryngkat ka Tnat pulit bad ki bor pyniaid district ka East Khasi Hills ki la pynlong ia ka jingialang bad palat 60 tylli ki Dorbar Shnong kiba hap hapoh ka Greater Shillong Area ha ka jingiadon lang ki MLA, MDC ban iamir jingmut halor ki sienjam ha ka jingiakhun pyrshah drok bad ban thaw ia ki kynhun Village Defence Party (VDP) ha ki shnong ki thaw khnang ban iarap ia ka sorkar ha kane ka thma drok.

Haba aijingkren ha kane ka jingialang kaba la long ha ka 7 tarik  mynta u bnai hapoh State Convention Centre, Shillong, u Myntri ka Tnat Social welfare u Bah Paul Lyngdoh u la ong, “Ka sienjam kaba nyngkong ba ki kynhun bapher bapher kiba ia don bynta ki la mynjur lang ka lng ban thaw thymmai biang ia ki kynhun VDP kiba trei borbah ban iakhun pyrshah ia ki kam bymman khamtam ha ki thain nongkyndong, hynrei haba phai sha ki sienjam ban tehlakam ia u drok bad ka jngsaphriang jong ki jingdih pynbuaid mynta ka sngi ngi la shim ia ka rai bad ki Dorbar Shnong bapher bapher kin pynkhreh na ka bynta ban thaw ia ki kynhun VDP.”

“Ban sdang ia kane, ngin hap ban sdang da kaba khmih biang ia ki rule kiba la thaw ha u snem 2008 (Meghalaya Village Defence Organisation Rules, 2008), bad namar ka dei kaba la slem kumta donkam ban pynthymmai ia kine ki rule namar ka jingnang kylla ha ka jinglong jingman bad ki jingeh jingtynjuh. Kumta ruh la shim ia ki jingtip na ki Dorbar Shnong bad buh por kumba 3 taiew haduh shi bnai ba kin phah ia ki jingai jingmut halor ka jingpynkylla ia kine ki rule,” u la bynrap.

U Bah Paul u la ong ba hadien ba la aijingmynjur ia kine ki jingpynkylla, ki Dorbar Shnong bapher bapher kin sdang ban thaw ia ki kynhun VDP ki ban iarap ia ka Tnat pulit bad ia ka sorkar ha ka jingiakhun pyrshah ia u drok ha la ki jong ki shnong ki thaw.

Haba kylli u Myntri u la ong ruh, “Ngin sa khmih biang ia kine ki rule. Ngin sa pynthikna ba ki VDP kin dei ki shipai ba la ithuh da ka sorkar bad ryngkat lang kin iarap ia ngi ban ithuh ia ki jaka kiba u drok u kham kynrei, bad da ka jingiarap ka jong ki ngin lah pat ban rat dyngkhong ia une u drok na kane ka jylla Meghalaya.”

Na ka liang u Bah Paul u ong ruh ba ka jingthmu jong kane ka jingialang hi ka long eh ban nangpynkhlain bad pynbun ia ki briew ha kane ka jingiakhun pyrshah ia u droks ka ban sdang naduh ki shnong ki thaw khnang ban iarap lem ia ki bor pulit bad khnang ba lah ban pynurlong ia kane ka thong.

Kumjuh u Myntri ula pyntip ba la shim ruh ia ka rai ban sam ia ki copy jong ki ain ba dang shu mih bad ki rules kum ka PITNDPS sha ki Dorbar Shnong ba kin iakhmih bad ai jingmut lang ha kaban pynjanai ia kine ki rules.

 “Ngi la shim ruh ia ka rai ba ki Nongmihkhmat paidbah, ki MLA bad MDC jong baroh kawei ka Jylla kin sdang ia kane kajuh ka kam kaba ngi la sdang mynta ka sngi bad ban leit iasyllok kylleng ki jaka namar ngi kwah ban iatreilang kum kawei ka kynhun ban pynthikna ia ka jingjop jong ka DREAM Project” ong shuh shuh u Myntri.