Iamir jingmut u CM bad ka ANTF halor ki sienjam ban rat dyngkhong ia u drok na ka Jylla

Syllad | The Rising MeghalayaDecember 10, 2024

U Myntri Rangbah ka Jylla u Conrad K Sangma ha ka 9 tarik Nohprah u la khot pynlong ia ka jingialang bad ka Tnad Anti-Narcotics Task Force (ANTF), Meghalaya ban iamir jingmut lang halor ki sienjam ia kiba yn pyntreikam na ka bynta ban rat dyngkhong ia u drok hapoh ka Jylla.

Ha kane ka jingialang la ia don lang ruh u Symbud Myntri Rangbah ka Jylla u Bah Prestone Tynsong, Ka Myntri ka Tnad ka koit ka khiah ka Dr M Ampareen Lyngdoh, u Myntri ka Tnad pule puthi u Rakkam Sangma, Myntri ka Social Welfare u Paul Lyngdoh bad ka DGP ka Kong Idashisha Nongrang nalor ki ophisar ka sorkar Jylla.

Ka jingialang ka la iatai sani bha halor ki laitylli ki sienjam ba kongsan ia kiba yn pyntreikam da ki bor jong ka ain, kata ka Tnat pulit, ka jingpynduna ia ka jingktah da ka Tnad ka koit ka khiah bad halor ka jingshngain ka imlang ka sahlang lyngba ka Tnad Social Welfare.

Nalor kata la iakren ruh halor ki jingkylla kiba ktah ha ka jinglong, ki jingtreikam bad ki rukom treikam jong ka ANTF bad halor ka jingtyrwa ia ki buit treikam bad jingiarap kiba donkam na ki Tnad bapher bapher, kata naduh ka Tnad Ain, ka Koit ka khiah, Pule puthi bad ka Tnad Social Welfare.

U Myntri Rangbah ka Jylla haba aijingkren u la ong ba ka long kaba donkam ban shim ia ki sienjam kiba bun ha ki rukom treikam bad ba ka ANTF ruh ka donkam ban shong iasyllok bad kawei pa kawei ka Tnad ba dei peit halor kane ka kam bad ban pyntreikam ia ki buit treikam ba kyllum bad ban pyntreikam ia ki plan ba shipor, kiba  katto katne por bad kiba neh slem slem.

“Ka bynta jong ka jingtreikam ka ANTF ka long kaba kongsan bad kaba kham iar, bad kumta ka long kaba iahap bad shong nongrim ban kheit shwa ia ki soh kiba don hajan bad ban pyntreikam ia ki buit kum ki project pyrshang ha ki katto katne ki jaka ba jur bha u drok ha ka Jylla,” u la ong.

U la bynrap ruh ba ka rukom treikam ka donkam ia ka jingiatreilang bad ka jingbym ailad haba pynshong nongrim halor ka jingktah  jong u drok ia ka longbriew manbriew ha ka Jylla, da kaba ong ruh, “Katba ki bor jong ka ain ki dei ban leh tyngeh pyrshah ia kiba donkti ha ki kam khaii drok, hynrei ha kajuh ka por na ka liang ka Tnad ka koit ka khiah bad ka Tnad Social Welfare ki dei ban shim ia ka bynta ban ai ia ki lad jingsumar bad ki jingiasyllok na ka bynta kito kiba la kyrni ha u drok khnang ban lah ban pynphai biang ia ki sha ka imlang ka sahlang.

Nalor kata u Myntri Rangbah u la ban jur ruh halor ka kamram jong ka Tnad pule puthi ban ialap bad pynshai paidbah halor ka jingshyrkhei jong u drok.

Shuh shuh ka jingialang ka la iakren ruh halor ka jingdonkam ban leh ia ki test, ka jingpynkhuid ia ka jingdon u drok ha ka met, bad ki jaka aijingsumar nalor ki sienjam ban pynkut ia ka jingioh wan rung jong u drok sha ka Jylla.