Iap 3 ngut kynthup i khynnah rit na ki jingjia twa khyndew namar ka jingjur slap ha Rilum Garo

Syllad | The Rising MeghalayaOctober 5, 2024

Lai ngut ki briew kaba kynthup ia iwei i khynnah rit ki la duh ei ia la ka jingim katba laingut kiwei pat ki la ngat ha ki jingmynsaw na ki jingjia twa khyndew bapher bapher kiba la jia ha ki  bynta jong ka West Garo District ha ka 4 tarik Risaw.

Kine ki jingjia ba sngewsih ki la wan jia ruh hadien ka jinghap slap kaba khlem sangeh ka la syllad ia ki district bapher bapher ka Jylla.   

Kine ki lanot kiba la khlad noh ki dei kiba la tip kyrteng kum ka Santa N Marak 57 snem rta na Koinabui, West Garo Hills, i khynnah iba dang san snem rta i Miardo P Marak na Sorokpara, West Garo Hills bad ka Sarika M. Marak, 18 snem rta na Kharongngre, West Garo Hills

Katba kiwei pat kiba la ngat ha ki jingmynsaw ki kynthup ia ka Moralistic N Marak, 28 snem rta na Koinabui, West Garo Hills kaba la mynsaw na ka jingtwa khyndew bad don mynta hapdeng ka jingshah sumar hapoh Dalu CHC. 

Ki arngut kiwei pat kiba la ngat ha ka jingmynsaw ki kynthup ia ka Parcella A. Sangma bad u Fredrick A. Sangma na Northern Hawkhana, West Garo Hills kiba la don mynta hapdeng ka jingshah sumar hapoh Civil Hospital.

Haduh 17 tylli ki shnong kiba don ha ki lai tylli ki district kiba la shah ktah na ka jingwan lyngshop ka bor mariang, katba 2,364 ngut ki briew ki la shah ktah jur namar ka jingther u slap ba khlem sangeh haki lai tylli ki district jong ka West Garo Hills, South West Garo Hills, bad South Garo Hills.

Kawei ka ïing ka la shah pynjulor katba ha South Garo Hills, kawei ka PHC ha Silkigre ka la shah rong noh ha ka um, bad ka surok ruh ka la khang. Halor kane ka jingjia ki nongshong shnong ki la pynioh jingiarap ia ki nongtrei bad ki nongshong shnong kiba sahkut.

Ha kajuh ka por, la pyntreikam ia ka State Disaster Response Force (SDRF) na Tura bad la pan jingiarap na ka National Disaster Response Force (NDRF) na Guwahati.

La phah ïa ki kynhun jong ki SDRF na Shillong sha Tura kum ka lad jingïada, katba ïa ki bor synshar shnong, kiba kynthup ïa ka Civil Defence, ki Pulit, ki Fire & Emergency Services, bad ïa ka Municipal Board kila long kiba la pynkhreh.