Ïap 5 ngut kynthup u ophisar ka tnad Forest, lait im 2 haka pung um ha Mihmyntdu

Syllad | The Rising MeghalayaMarch 29, 2021

Haduh 5 ngut ki briew kila duh ei iaka jingim bad 2 ngut kila lait im hadien ba kila sah kut haka pung um dih haka shnong Lumpyrtuh Mihmyntdu, West Jaintia Hills District haka sngi Nyngkong.

Kane ka jingïap jong kine ki briew kadei naka jingïap op naka tdem kaba mih naka kor pump um haka por ba ki pynkhuid iaka tyllong um kaba jrong kumba 35 phut.

Kine ki 5 ngut kiba la khlad ki dei u Hamklet Suchiang (37) uba dei u trai ïing bad u dei ruh u ophisar ka tnad Forest (Social Forestry Division), u Phima Dkhar (24), Daniboy Ïano (27), Niwan Suchiang (48) bad u Bunlad Suchiang (34). Baroh kine kiba la khlad kidei kiba naka shnong Raliang, West Jaintia Hills District.

Ar ngut kiba lait im ki dei u Deiwa Lyngdoh (18) bad u Phrang Khyriem (40).

U Deiwa Lyngdoh, u wei na kiba lait im ula iathuh ba ki trei bylla ha kane ka iing. Ula ong ba kane ka jingjia kala jia haka por kumba 2:30 nohphaisngi. Ula ong ba hadien bala dep bam ja sngi kila pynkhuid ia katei ka um da kaba pyndonkam da ka kor pump um ban tan iaka um.

Ula ong nyngkong la rung shuwa ar ngut bad kila start iaka kor pump um na shapoh ka pung um, hynrei na ka jingsma bad ka jingjur ka tdem na ka kor pump um kala pynlong ïaki duh lyer. “Uwei hadien uwei ngi la hiar shapoh ka tyllong um ban ïarap, hynrei baroh kila sahkut hapoh ka pung um bad kim lait mih shuh,” la ong u Deiwa uba la bynrap ïalade ruh hadien ba um lah shah shuh u la ksaid jubor ban mih shabar na katei ka tyllong um kaba jrong kumba 35 phut eiei.  

Hadien bala mih u Deiwa mar mar kila pyntip sha ka tnad Fire and Emergency Service, Jowai kiba la wan ban ai jingïarap. Ki pulit Fire and Emergency Service kila ïoh ban sei ar ngut, nyngkong ia u Phrang Khyriem hadien ia u Bunlad Suchiang, uba la khlad ha hospital ha Woodland WK Hospital.

Hadien bala wan ki Search and Rescue Team na Shillong pat kila ïoh ban sei sa saw tylli ki metiap napoh ka pung um.

Ki Pulit jong ka Jowai Police Station kila shimtia iaki metiap bad kit sha Jowai Civil Hospital, Ialong ban pyndep iaka jingdonkam jong ka aiñ.