Iap hashen 3 ngut ba noh ka trok kit Masi sha ka jaka riat ha lad Mawkhap, Pynursla

Syllad | The Rising MeghalayaAugust 7, 2023

Laingut ki briew ki la iap hashen, katba uwei pat u la lait im hadien ba ka trok LP kaba ki shong kala noh sha ka jaka riat ba jylliew ha ka lynti surok ha Lad Mawkhap, Pynursla ha ka ka miet sngi U Blei ba la lah.

Na ka liang u Superintendent of Police ka East Khasi Hills, Shillong u la pynpaw ba ki la ioh ia ka jingtip ba kawei ka trok LP kaba don ia u registration No. ML05 G 9528 ba la niah da u Yomiki Kharshandi 20 snem rta kaba kit ryngkat 12 tylli ki masi ka la mih na ka thain Pynursla ban leit sha Laitlyngkot hadien ba ka la sniew noh ha Langkyrdem bad maramot ia ka ha kane ka jaka.

Hynrei hadien ba ka la poi ha kawei ka jaka khongdong ha Khoh-yiar hajan ka lad Mawkhap ka surok NH-40, u gear jong kane ka kali u la thut (jammed) kaba la pynlong ia kane ka kali ba kan tyllun shadien bad hap sha katei ka jaka riat ba jylliew.

Hadien kane na ka liang ki pulit ki la hiar mardor sha katei ka jaka hadien ba ki la ioh jingtip ba uwei na kine kiba don hapoh katei ka trok ia uba la tip kyrteng kum u Bah Bansiew Khongklian uba dei na ka shnong Phlangshlain u la ioh lait im ban kiew noh shalor surok.

La iathuh ruh ba ia u Yomiki Kharshandi la lap ba u dang im hynrei ki laingut kiwei pat ia kiba la tip kyrteng kum u Kyndaiborlang Kurbah uba dei na ka shnong Kseh Mawnai, u Banpeitlasng Marbaniang na Nongshken Mawdang bad u Welbokstar Sohlang na Kseh Mawnai kila khlad hashen.

Ha kaba iadei bad kane ka jingjia la rejistar case hapoh Pynursla Police Station bad ka jingtohkit ka la iaid shakhmat.