Iap ki dohkha ba ber dawai bih ki runar ha Wah Bampyrthap, Mukhla

Syllad | The Rising MeghalayaFebruary 2, 2025

Ka Fishing Association Mukhla Dorbar Pyllun kala pyntip ba ka don ka jingjia iap dohkha hadien ba ki runar kila ber da ki dawai bih kaba la ktah iaka jinglong jingman ka wah bad ki dohum dohpnat.

Ka synjuk kala pyntip ba kane ka jingjia kala jia haka 30 tarik Kyllalyngkot, u bnai bala dep ha kaba ki runar kila ber iaki dawai bih kaba la wanrah ka jingiap pathar ki dohkha haka wah Bampyrthap, Mukhla. Kine ki jingjia kila jia naka por shaka por khamtam haka por tlang ba duna um ki wah.

U General Secretary, Mukhla Dorbar Pyllun Fishing Association Ma Charles Sumer ula ong ba kane ka jingjia kala wanrah ka jingsngewsih iaka association shimkhia ban iada ia ki dohum dohpnat, kumta kala maham jur Ia ki runar kiba pynsniew iaka wah bad pyniap iaki dohum bad lada ka lap ka synjuk kan leh da kaba tyngeh bad ban aiti sha ka bor jong ka ain.

Ula kyntu ia ki paidbah kiba thied ba pet iaki dohkha ban long kiba husiar bad kim dei ban thied klumar iaki dohkha pnar ha iew, ioh lehse ki dei ki dohkha kiba shah ktah na ka jingber dawai bih kaba lah ban ktah iaka koit ka khiah u briew bad wanrah iaka jingjia kaba sngewsih.

Une u nongialam ula khot ka jingiatreilang jong baroh ban pynneh pynsah iaki dohum dohpnat bad iakhun pyrshah iaki runar ba pynjot bad pyniap iaki dohum.