Iap sa 2 ngut na ka jingtwa khyndew ha EGH; sha ka 15 ngut kiew ka jingiap ha Rilum Garo

Syllad | The Rising MeghalayaOctober 6, 2024

Ka jingdon jong kiba iap na ki jingjia shah lynshop ha ki bor mariang ha Rilum Garo ka la kiew sha ka 15 ngut hadien ka jingiap  jong ki arngut ki briew na ka jingjia twa khyndew ha Gongdop, Rongjeng block, East Garo Hills kaba la jia ha ka 6 tarik u Risaw, ong ka khubor sorkar.

Kine ki arngut ki lanot kiba la khlad noh ki dei kiba la tip kyrteng kum u Manasse Marak (14) bad ka Amy Mara 40 snem rta. Ha ka 5 tarik uwei u rangbah 28 snem rta uba kyrteng u Tengseng R Marak u la khlad noh hadien ba uwei u dieng ula khyllem bad leit ban ia u ha ka shnong Thibapara ha Dalu, WGH.

Ha ka 4 tarik u Risaw san ngut ki briew ki la iap na ki jingjia twa khyndew bad jingshlei um hapoh WGH. Katba ka Santa N Marak (57), Miardo P Marak (5) bad ka Sarika M Marak (18 snem rta ) ki la khlad noh na ka jingjia twa khyndew ha Koinabui, Sorokpara bad ki bynta jong ka Kharongngre. Katba u Bijoy S Sangma (43) bad u Wian Chigado R Marak (13 snem rta ) kiba dei ki shikpa shi khun ki la khlad noh na ka jingshah rah umsaw ha ki bynta jong ka thain Rongkong Songgital, WGH.

Ha kane ka juh ka sngi hynniew ngut ki dkhot jong kawei ka longiing ki la khlad noh na ka jingtwa khyndew ha Atisia Songmong, South Garo Hills.

Kine ki lanot ki dei kiba la tip kyrteng kum ka Silji R. Marak (60), ka khun jong ka, ka Merina R. Marak (39), u pyrsa u Sama N. Sangma (50), ka khun ksiew ka Chengbe R. Marak (22), u khun u Desrang R. Marak (14), khun ksiew ka Silbera R. Marak (8), u khun ksiew jong u khun u Dimse R. Marak (uba dang 1.5) snem rta .

Ha ka 5 tarik Risaw u Myntri Rangbah ka Jylla u Conrad K Sangma u la khot pynlong ia ka jingialang bishar kam ban bishar bniah ia ka jinglong jingman namar ka jingshlei um ha Rilum Garo.

Na ka liang u CM u la bthah ruh ia ki bor pyniaid district ba kin pyllait noh mardor ia ki lad jingiarap sha kiba haiing hasem jong ki laingut ki briew kiba la khlad noh ha Dalu.

Nalor kata u la bthah ruh ia ki bor ba dei khmih ban pan ia kino kino ki lad jingiarap na ka sorkar bad ban pynthikna ba ki lad jingiarap ki dei ban iaid shakhmat sha kito ki jaka kiba la shah ktah na ka jingshlei um bad ki jingtwa khyndew.

Ka leit ka wan na Dalu ha Baghmara lem bad kiwei pat ki jaka ki la shah pynthut namar kiba buntylli ki jingjia twa khyndew. U CM u la bthah ruh ia ki bor district ba kin pyndonkam da kiwei pat ki lynti iaid na ka bynta ban pynbha pat ia kine surok kiba la shah ktah ha Dalu bad ki bynta jong ka Baghmara.

Nalor kata u Conrad u la bthah ruh ban tei pat ia ka jingkieng dieng kaba la shah pynjulor bad shah rah noh ha ka umsaw.U la ai jingmut ban pyndonkam da ka Bailey bridge technology na ka bynta ban shna ia kane ka jingkieng khnang ban lah ban pyndep kloi, (kata ki tiar kiba la shna lypa bad kiba donkam ban shu pyndait, kiba suk ban pynpoi).

U CM u la pyntip ruh ha ka jingialang ba ia baroh ki jingkieng dieng ha ka Jylla kiba la dep ban ithuh yn sa bujli noh da ki jingtei kiba thymmai. Kumjuh ruh u CM u la bthah ia ki bor ba dei khmih ba kin long kiba peitngor bha ia ka jinglong jingman baroh.