Iap u samla, kynnoh shah tynrah ha ka kali ba synran ia ki heh kiba ia beh sha ka tamasa Cherry Blossom

Syllad | The Rising MeghalayaNovember 16, 2024

Uwei u samla u la duh ei ia la ka jingim katba kawei pat ka samla ka la mynsaw jur hadien ba ka thuk thuk kaba ki shong la kynnoh ba ka la shah tynrah ha ka kali pulit kaba synran ia ki kali ki heh ki hain kiba ia beh ban leit sha ka tamasa Cherry Blossom ha Bhoirymbong ha ka janmiet jong ka 15 tarik u Naiwieng.

Katkum ka khubor ka iathuh ba kane ka jingjia ka la jia ha ka surok Shillong -Bypass hajan ICAR, Umiam, kata kumba 10 km na ka jaka ba pynlong ia ka tamasa Cherry Blossom Festival ha Bhoirymbong. Kane ka thuk thuk kaba shong da kine ki arngut ki samla ka dei kaba don ia u nombor ML05-AD-0566.

Une u samla u dei uba la tip kyrteng kum u Hudderfield Rymbui (ba khot sin Hu) uba dei na ka shnong Nongtalang, West Jaintia Hills District bad uba shong ba sah shipor hapoh Nongrah, Shillong, East Khasi Hills District.

La pynkit noh ia u sha Holy Cross Health Centre kaba don ha Umbir, hynrei ki doktor kiba pynbna ba u samla Hudderfield Rymbui ula dep khlad noh.

Kiba sakhi da la ki jong ki khmat ki la kynnoh ba kam shym la don satia ka kali Ambulance namar ka jingbun ki kali ba jur ka dheng kali bad ki briew kiba don iaka mynsiem iarap ruh kim lah leh eiei.