Iap uwei, ioh pyllait im ia arngut ki samla ba hap hapoh ka pung ha Jowai

Syllad | The Rising MeghalayaJuly 24, 2024

Uwei u samla u la duh ei la ka jingim na ka daw jong ka jingiap op katba ia arngut kiwei pat la lah ban pyllait im hadien ba ki la kum hap hapoh kawei ka pung ha ki bynta jong ka sor Jowai ha ka janmiet 24 tarik mynta u bnai.

Kane ka jingjia ka la jia ha Khliehrymphum, Ladthadlaboh hajan Polytechnic Jowai, bad baroh kine ki laingut ki dei na ka shnong Sabah Muswang.

Na ka liang u SP u la ong ba ha kane ka sngi ha ka por kumba 5 baje janmiet, arngut ki nongtrei bylla kiba kynthup ia u Sbor Shylla bad u Freddie Shylla ki dang bunkam ha kaba pynkhuid ia kawei ka pung um kaba jylliew kumba 40 phut hadien ba ki la hap shapoh jong kane ka pung na ka daw ka jingbym lah ring mynsiem namar ka tdem kaba jur ba la pynmih da ka pump um kaba ki la pyndonkam.

U la ong ruh ba ki nongshong shnong mar mar ki la wan ban aijingiarap ia kine ki arngut bad ioh ban pyllait im ia ki hapdeng ka jingbym tip briew. Hadien kane la pynkit noh ia ki mardor shapoh hospital ha kaba ki la sdang ban kyndit bynriew.

Hynrei uwei pat u samla uba kyrteng u Ribun Phawa uba la wan ban iarap sei ia kine ki arngut na katei ka pung u la hap ia lade shapoh kane ka pung na kajuh ka daw ka jingbym lah ring mynsiem.

Hadien na ka liang ki pulit ha ryngkat ki dkhot na ka tnat fire service ki la lah ban khwai noh ia ka met jong u ha ka por kumba 8 baje janmiet ha kaba la shem ba u la khlad noh, ong une u heh pulit.