Iarap ki Pulit ia kiba duk ba kyrduh & pynioh lad jingsumar iaki para pulit ha West Jaintia Hills

Syllad | The Rising MeghalayaMarch 29, 2020

Ki Pulit ka West Jaintia Hills District Executive Force kum shibynta ban pynurlong ïaka jingthmu u Myntri Rangbah Duh ka Ri uba la kyrpad ïaki nongshong shnong ka ri ban iarap ia kiba duk ba kyrduh haka jingkhang khyrdep ia baroh kawei ka Ri ban iakhun ban pyndkut ia u kynjri jong ka jingpur u ‘niang COVID-19 kila kner iala ka kti jingiarap jong ki da kaba ai sngewbha da u khaw, biskit, dai bad kiwei kiwei ki mar bam sha ki longïing kiba wan ki longing ba duk.

U Superintendent of Police Bah Lakador Syiem, ula iathuh ba ia kane ka jingleit ai jingiarap da u kaw bad kiwei ki mar bam la sdang naduh ka Sngi Saitjain ha ki shnong kiba ha Phramer traffic cell bad pynbud sha ka shnong Raliang.

Kane ka jingsynniang ki pulit da ki mar bam sha ki longïing kiba duk, kala pynphuh mut phuh mat ïa kine ki ïing khamtam ha kum kane ka por ba khang khyrdep ki iew ki hat bad ka jingduna mar bam ha ki thain nongkyndong nalor ka jinghap ban shong iing bad pep ka leit bylla sngi.

Kane ka jingsynniang ki Pulit sha ki longïing kiba duk ka dei ka nukaa ba kiwei pat ki kynhun  ki dei ban bud namar ba kane ka thain kadei kaba bun hi ki nongshong shnong ki dei ki nongrep nongbylla kaba ki la ïakynduh jingeh bha ha kum kine ki por kaba ka ri ka iakhun pyrshah ban tem ïaka jingpur u khniang Coronavirus.

Shuh shuh ha kawei pat ka khubor u SP ula iathuh ba wat ïaki para pulit ruh ka WJHDEF kala pynioh da ka Mobile Medical Team (MMT) ban leit ai sumar iaki para pulit kiba don ha kylleng ki Police Station, Out Post bad ki Beat House kiba ym ïoh ka lad ban wan Jowai haka jingpyndep ïala ka kamram ban wanrah ïaka shongsuk shongsain haka district.

Kane ka  Mobile medical Team kaba don ki Doktor bad nos bad kin leit ha man la kawei pa kawei ka thanad, ki outpost bad beat.house ban pynthikna ki pulit baroh ki don haka met kaba koit kaba khiah, ong u SP Bah Lakador Syiem.

La ong ruh ba kito ki pulit kiba trei sha kiwei kiwei ki jaka kiba ym ioh khaw ne mar bam mardih la buh bhah ha Police Reserve Jowai.