Iaroh u Bah Hek iaka rai jong ka party ban tohkit halor ka kam tih dewiong beain

Syllad | The Rising MeghalayaMarch 19, 2025

U nongialam ka BJP uba dei ruh u Myntri ka sorkar Jylla u Bah AL Hek ha ka 18 tarik Lber u la iaroh ia ka rai jong ka party ban thaw ia ka committee wad bniah halor ki jingkynnoh kam tih dewiong beain ha ka Jylla.

Haba kren sha ki lad pathai khubor, u Bah Hek u la ong, “Ngam shym la iakynduh ia ki nongialam ka BJP ha ka jylla Meghalaya mynta lah saw san bnai, hynrei nga la iohi lyngba ki lad pathai khubor shaphang ka rai jong ka party ban thaw ia ka committee ka ban wad bniah halor ki jingshisha, bad la leh ia kane na ka bynta ka jingbha jong ki paidbah kumta ngi dei ban iaroh ba ka party ka la shimkhia ia kane ka mat.”

“Ka long kaba shisha ba haba ngi la dep ban rah ia ka mat na ka bynta ka jingmyntoi jong ka jylla bad ki briew jong ka, ka jingmih ka dei ban mih bad pynioh ia ki hok jong ki paidbah ka Meghalaya,” u la ong da kaba bynrap, “Kam dei ia ka BJP ba kan shim ia ka rai, ka dei ka sorkar ba kan shim ia ka rai.Ngi kum ka sorkar ngin shim ia ka rai katkum ka jingsngewkhia ym tang jong ki seng sain pyrthei hynrei wat na ka liang ki riew paidbah kumjuh.”

Ka BJP kaba dei kawei na ki paralok synrop hapoh ka sorkar MDA ba la ialam da ka NPP ka la ai por 40 sngi ia ka committee wad bniah ba kan aiti ia ka kaiphot jong ka halor ki jingkynnoh kiba iadei bad ka kam tih dewiong beain.

U MDC ka Tura u Bernard R Marak u dei uba la khlieh ia kane ka committee kum u convener, u Bah Mariahom Kharkrang kum u secretary bad 8 ngut ki dkhot kiba kynthup ia u ma Lakhon Biam, u Raphius Sangma, u bah Commanderful Sana, u Karabar Tynkan, ka Daniella Nonglait, u Darihun Marbaniang, u Arun Kumar bad u Pramod Jain.