Iaroh u Bah Sanbor ba kyrshan pura ka BJP ia ki kyrtong ka Seng NPP ha Meghalaya

Syllad | The Rising MeghalayaMarch 24, 2024

U MLA ka BJP ka South Shillong u Bah Sanbor Shullai ha ka 23 tarik Lber, u la pdiang sngewbha ia ka jingshim rai da ki nongialam napoh central ban ai ka jingkyrshan kaba pura ia ka Seng National People’s Party (NPP) ha kane ka Lok Sabha Election ka ban wan ha ka Jylla.

U Bah Shullai uba dei ruh u kyrtong MP ka BJP ha u snem 2019 u la ong ba namar ka NPP ka dei ka party kaba bun paid tam bad ruh ka paralok hapoh ka kynhun National Democratic Alliance (NDA) kumta ruh kam don kano kano ka jingsngew pher halor ka rai jong ki nongialam ba halor ban aijingkyrshan ia ki kyrtong ka NPP napoh Shillong bad Tura Lok Sabha Seat.

U la ong ruh ba ka BJP la kumno kumno ka don ia ka vote bank kaba kumba hynniewphew hajar bad kaba lah ruh ban kiew sha ka shi lak na ka bynta ka Shillong parliamentary seat.Lada kane ka vote ba iasam kan leit sha ka kynhun synrop NDA, kumta ruh ka don ka jingkyrmen kaba skhem ia ka kyrtong ia mon lang ba kan ioh ia ka jingjop namar kam don shuh ka jingiaphiah ia ki vote.

Nalor kata une u MLA ka BJP u kyrpad ruh ia baroh ki nongialam jong ka party ba ki dei ban kiar na kino kino ki jingiapher jingmut hapoh ka party bad ba kum ka party ka dei ban iatylli lang kawei khnang ba kan long ka jingiarap na ka bynta ka NDA.

“Lada ka NPP kan ioh ia ka jingjop, ki MP na ka jylla jong ngi kin ioh ia ka sur kaba kham biang ban ia u kyrtong Congress na ka liang pyrshah.Teng teng ngi dei ban khmih khmih nalor ki sain hima jong ki party bad ban phaikhmat shwa na ka bynta ka roi ka par jong ka Jylla.Kam don kano kano ka jingartatien ba ka BJP hapoh ka jingialam jong u Myntri Rangbahduh Narendra Modi kan ioh palat 400 seat ha kane ka kynti kaba mynta, kumta lada ngi lah ban ai ar seat na Meghalaya kane kan iarap ia ka Jylla ba kan ioh shuh shuh ia ki lad jingiarap bad ki skhin ka sorkar pdeng,” ong u Bah Shullai.

Nalor kata u l ong ruh, “Lada ngin jop na baroh artylli ki seat ngi thikna wat ban ioh ia ka kam Myntri ka sorkar Pdeng. Kumta ki kyrtong ia mon lang kan iarap ban weng ia baroh ki jingdawa ba sahteng jong ka Jylla na ka sorkar Pdeng. Pynban ia ki jingsngew iapher jingmut ha ki kynhun synrop kiba hapoh dei ia ka ban pynbeit da ka jingiasngewthuh jingmut,” ong  u MLA ka BJP.

Shuh shuh u Bah Sanbor u la ong ba ka long kaba donkam ia ka BJP Meghalaya ba kan bud ia ki nuksa jong ka Nagaland ha kaba ka NDPP bad ka BJP ki la iatreilang da ka jingiasngewthuh jingmut lang bad jop haduh palat 37 seat. U la ong kiwei pat ki party trai ri ki bym iohi jngai kim long ei ei hynrei tang kum ki soh ba mih da ka por, kiba kiba wan bad leit man ba kylla ka aiom.