Iashim bynta palat 200 ngut ki khynnah skul haka Winter Camp ha phyllaw ka NEAU Khliehtyrshi

Syllad | The Rising MeghalayaDecember 2, 2023

Haduh kumba 200 ngut ki khynnah skul na ka thain West Jaintia Hills district ki la iashim bynta ha ka winter camp ba lai sngi kynthih ba la ai kyrteng  “Spectrum of Life” ba la pynlong halor ka mat “The future is yours”.

Ia kane ka prokram la khot pynlong da ka ophis u District Planning Officer, West Jaintia Hills, ha ryngkat ka jingiatreilang bad kiwei kiwei pat ki tnat sorkar bad ki kynhun bhalang bapher bapher. Ha kane ka camp la jied san sannguh ki khynnah skul na ki 40 tylli ki skul na ki thain nongkyndong bad ki jaka sor jong ka West Jaintia Hills.

Ia kane ka camp la pynlong hapoh ka jaka jong ka North East Adventist University, Khliehtyrchi, West Jaintia Hills naduh ka 29 haduh ka 1 tarik Nohprah 2023. La sdang ia kane ka prokram lyngba ka jingplie ia ka prokram ha kaba u MLA ka thain u Ma Wailadmiki Shylla ha ka jingkren u la kyntu ia ki khynnah ba kin beh sha ka thong da ka mynsiem kaba kmen.

Kiwei pat kiba la aijingkren ha kane ka jingialang plie ki kynthup ia u Bah Silvester Phanbuh MCS, FB Basan, DPO bad ka Kong B Blah ADC bad Election Officer West Jaintia Hills District.

La pynbud ia kane ka jingialang plie da kaba pynlong ia ka jingialang ba la pyniaid da u Dr HH Mohrmen bad ka Niwanka Shylla na ka Society for Urban and Rural Empowerment (SURE), Jowai. Ka bynta ba kongsan jong kane ka camp ka long halor ka jingiaid trekking bad camping napoh NEAU campus hapoh ka pung Thadlaskein, ha kaba ha kane ka jingiaid lynti la pynlong ruh ia ka jinglum ia ki niut ki nier kiba don ha ki sawdong sawkun jong kane ka pung bad ha ki lynti syngkien.

Hadien ba la poi ha kane ka pung ba pawnam, u Dr. Mohrmen u la pynsngew ruh hapdeng ki khynnah halor ka khana shaphang u Sajar Nangli bad halor ka khana jong kane ka pung Thadlaskein. Ha ka por mynstep la pynlong ia ka zumba bad yoga session ha ka session hapoh ka jingialam da ki dkhot ka Bharat Scout and Guides bad kawei pat ka session halor ka jingktah kiba mih lyngba ka jingpyndonkam ia ki social media bad kumno ban iakhun pyrshah ia ki kam kren bein bad ki kam kynthoh lyngba ki kor internet ne ‘cyber bullying.’

Nalor kata u Dr Mohrmen u la ai ruh ka jingkren ha kaba iadei bad ki jingkylla ha ka suinbneng ne climate change bad halor ka jingkhluit ha ka sla pyrthei ne ka global warming.

Na ka liang u samla Daniel P Gatphoh na Jowai uba pyntbit da lade hi kum u nongshongdur bad nongringdur u la pynpaw halor ka jingiaid lynti ka jong u bad kumno ba u la kylla long u nongringdur ba tbit.

Nalor kata la plielad ruh ia ki khynnah ba kin iakynduh bad iamir jingmut bad ki briew kiba la lah ban pynpawkhmat ia lade kiba kynthup iaka kynhun ki Chi Iung, Simi Kongthiang ka nongshna phlim, Irene Dkhar ka Miss Meghalaya bad Miss North East, Ehok Suchiang, Eugene Lyngdoh uba dei u nongialehkai football ba pawnam ka jylla bad kiwei pat.

Ha ka sngi kut ka ophis jong ka District Skill Development Officer ha ryngkat ki nongai jinghikai ki la ai ia ki jinghikai bapher bapher kiba la pynmyntoi shibun ia ki khynnah kiba la iashim bynta.