Ïashim bynta shitrhem ki samla pule na ki skul bad kolej haka Youth Festival bad ka International Youth Day ha EJH

Syllad | The Rising MeghalayaAugust 19, 2019

KHLIEHRIAT: Ka Society For Promotion of Tourism, Khliehriat ka la pynlong ia ka District Level Youth Festival bad ka jingrakhe ia ka International Youth Day (IYD) – 2019 naduh ka 13th – 17th Nailar (August) 2019.

Ïa kane ka prokram la bei pisa da ka Chief Minister Youth Development Scheme (CMYDS) lyngba ka ophis jong u Deputy Commissioner, East Jaintia Hills District ha ryngkat ka jingiatreilang bad ka National Service Scheme jong ka Jaintia Eastern College, Khliehriat.

Ha kane ka District Youth Festival ki samla pule kum na ka skul Wapungskur Higher School, Khliehriat Presbyterian Higher Secondary School, J.E Higher Secondary School, St. Anthony’s College Byndihati Extension bad ka Jaintia Eastern College bad kumjuh ruh ka Sein khynroo khynlood, Lumputhoi ki la wan ban ia shim bynta shitrhem ban pyni ia ki sap ki phong halor ki jingshad bad jingrwai tynrai bad ha kiwei kiwei ki program.

Ka samla Kitbor Nongtdu, ka Hameki Lamoo na ka Jaintia Eastern College bad ka Gloria Chyrmang bad ka Medifullda Muksor na ka J.E Higher Secondary School ki la khur ia ka nam jop ha ka jingiakop dro dur (Drawing & Painting Competition) halor ka phang “Ban pynneh pynsah ia ka mei Mariang” (Conservation of Environment) bad ki jingrwai tynrai.

U Angkat Kumar (St. Anthony’s College Byndihati Extention), ka Santona Hajong, ka Brilliant Lapasam na Jaintia Eastern College bad u Ranjit Kumar na ka St. Anthony’s College Byndihati Extention ki long ki nongjop ha ka jingiakop thoh Esse (Essay Competition) halor ka phang “Ka bynta ki samla pule halor ka Swachh Bharat Abhiyan” (Role of Students in Swachh Bharat Abhiyan).

Ha ka 15 Nailar la pynlong ia ka Jingpyrta bad Jingialap (Slogan & Poster Campaign) ha ka jaka bala pynlong ia ka jingrakhe laitluid (Independence Day) halor ka phang “Slogan & Poster on Freedom Movement”. Haka sngi kaba bud 16 tarik Nailar ki samla pule bad ki samla shnong ki la ia shim bynta lang ha ka jingrakhe ia ka International Youth Day 2019 ba la pynlong da ka Jaintia Eastern College.

Ha ka 17th August kaba dei ka sngi khadduh jong kane ka District Youth Festival la pynlong ia ka jingiaid kjat (Trekking) halor ka phang “Ban pynneh pynsah ia ka mariang bad ban kyntiew ia ka kam jngoh kai pyrthei”(Eco-Tourism) sha Umlaru bad Wah Phe Phe ha ka shnong Rymbai kaba jngai kumba 15km.

Ha kane ka Festival u Dr. S. Shangpung, E.M i/c Education, JHADC kum u kongsan u la kyrkhu kyrdoh ia ka jinglehkmen bad u la sam ia ki buskit sha ki nongjop bad ka syrnod sha baroh ki nongiashim bynta.

La pynkut ia ka District Youth Festival ha ka 17th August ha Wah Umlaru, Rymbai da ka jingiashim bynta jong ki arspah san phew san ngut kynthup ia ki samla pule, NSS volunteers bad ki samla shnong ryngkat ka jingia dihsha lang bad ia ki kyntien ai khublei la ai da I Principal jong ka Jaintia Eastern College.