Iashim bynta u CM ka jylla ha ka ‘International Day of the World’s Indigenous People’

Syllad | The Rising MeghalayaAugust 9, 2023

U Myntri Rangbah ka jylla u Conrad K Sangma mynta ka sngi Balang u la leit iashim bynta ha ka “International Day of the World’s Indigenous People” ia kaba la khot pynlong da ka North East Indigenous People’s Forum (NEIPF), Meghalaya Chapter ha Multi Conventional Hall, NEHU, Shillong.

Haba kren ha ka jingialang, u CM Conrad Sangma u la ong ba ki mat kiba iapher hapdeng ki jaidbynriew trai shnong jong ka thain shatei lammihngi (Northeast) barabor ka wanrah ka jingsngewkhia kaba jur na ka bynta jong u.

 “Ki party sain hima bapher bapher lane ki kynhun seng bapher bapher ki don ia kajuh ka thong haba phai ha kaba iadei bad ki trai shnong, kata ban pynneh pynneh pynsah ia ka jinglong jingman bad ia ka kolshor bad ka tynrai jong ki, bad dei lyngba kane kaba pyniapher ia ngi na kiwei pat ki kynhun nongshong shnong kata ban sngew sarong halor ka jingithuh kum ki trai shnong,” ong u Myntri Rangbah.

U la bynrap ruh ba ka long kaba donkam ban pynkylla ia ki rukom pyrkhat jong ki briew khamtam ia ki kynhun nongshong shnong kiba dei ki trai shnong bad ban sangeh ban khmih lynti ba kan don beit ka bhah kyrpang ha baroh ki bynta jong ka jingim. U la ong ruh ba ngi dei ban kham iar ki jingmut jingpyrkhat bad ba ki samla ka thain Northeast ki dei ban don ia ka mynsiem ban lah ban ia aireng bad kiwei pat.

U CM u la ong ruh ba ka long kaba kongsan ba ka jinglong tynrai jong ngi kaba ngi sngew sarong hynrei ngim dei ban shim sting halor kiei kiei baroh. Nalor kata u la kyntu ruh ia  NEIPF ban shim ia ki sienjam ban wad bniah ia ki kynhun jaidbynriew trai shnong bapher bapher jong ka thain North East.

Nalor kata u la ong ba ka sorkar Meghalaya ka ka la iatreilang bad ki laitylli ki autonomous council ban phaikhmat ha kaba iadei bad ki bynta bapher bapher kiba iadei bad ki kolshor bad ki jingle jingkam tynrai jong ki jaidbynriew trai muluk ka jylla.

Shuh shuh u la ong ruh ba ki jylla bapher bapher jong ka thain Northeast namar ka jingdon bun jong ki kynhun jaidbynriew bapher bapher kumta kane ka  pynmih ia shibun ki jingeh bad ki jingialeh, bad lyngba ka jingpynlong ia kiba kum kine ki prokram kane ka thain Northeat kan lah ban kiew rasong bad weng ia kine ki jingeh bad ban pynlong ia kane ka thain kaba khlain.

 “Ka pang ka mynsiem ban iohi ia ka jinglong jingman hapoh Manipur, bad Nga kyrmen ba ki kynhun kum ka NEIPF kan shim ia kane ka mat na ka bynta ban lah ban wanrah pat ia ka jingsuk ha Manipur.

Shwa kane u CM u la pyllait paidbah ruh ia ka kot kaba kyrteng “Indigenous 2023” ha kane ka jingialang ba la wan iashim bynta da ki nongmihkhmat na ki jylla ka thain Northeast.