Iashimbynta 900 ngut ki ki athlete haka Inter School Athletic Meet ha Jowai

Syllad | The Rising MeghalayaApril 23, 2025

Ka lympung ialehkai ‘District Level Inter School Athletic Meet 2025’ ba la pyniaid da ka ophis District Sports Officer (DSO), West Jaintia Hills ryngkat ka jingiatreilang ka West Jaintia District Sports Association (WJDSA) ka la sdang haka 23 tarik Iaiong ha madan Kiang Nangbah Stadium, Jowai.

Ha kane ka lympung ialehkai ba lai sngi lynter la wan shim bynta da 900 ngut tam ki khynnah shynrang bad kynthei na ki 28 tylli ki skul na kylleng ka District hala ki jong ki jong ki kyrdan ialehkai kiba kynthup naduh ka Under-14, 16 bad 18.

Iaka jingbamsmai ne oath ceremony la lam khmat da u ka Deigracious Dan na ka skul North Liberty Higher Secondary School.

Ia kane ka Inter School Athletic meet la wan ban plie da ka Kong AP Syiem, Joint Director School Education & Literacy, Government of Meghalaya kaba la kitbok kitrwiang sha baroh ki khynnah kiba iashim bynta, bad pynpaw ruh ba ka jingialehkai ka pynwandur ia ka jinglong bad ka lawei jong ki khynnah, bad lyngba kum kine ki rynsan ka ai lad iaki khynnah ban pyni ia ka sap bad jingtbit jong ki haka kam ialehkai.

U Ma Khroobok Passah District Sports Officer West Jaintia Hills District bad u Ma Patrick Lamare, Vice President, WJDSA ruh ki la don lang ha kane ka sngi, nalor ki nonghikai bad khynnah skul.

Haka sngi sdang la pyndep iaki jingialehkai kynthup naduh ka Shotput, High Jump, Long jump, ka jingiakop mareh ba 60m, 100m, 300m, 1000m ha kaba ki khynnah shynrang bad kynthei ki la iashim bynta shitrhem ban pyni iaka sap bad ka talent ialehkai.