Ïashimbynta palat 300 ngut kiba duna haka bor met haka ‘We Ring the Bell Campaign’ ka Bethany Society

Syllad | The Rising MeghalayaMarch 30, 2021

Palat 300 ngut ki khynnah, ki samla bad rangbah kila shimbynta shitrhem haka campaign ‘We Ring the Bell Campaign 2021’ jong ka Bethany Society, Phramer-CBID Unit, ka campaign ban pynshlur ia kiba duna haka bor met ban leit skul bad ruh ban pynrung skul ïa kum kine ki khynnah ha ki skul haka Jylla.

Ïa kane ka prokram ka Bethany Society, Phramer-CBID Unit ryngkat ka jingkyrshan ka Jan Vikas Samiti, Varanasi kala pynlong ha Thadmuthlong-B, Muthongrim and Thadmuthlong-A naduh ka 20 tarik haduh 25 tarik une u bnai.

Nalor ki khynnah la ïashimbynta ruh ki kmie ki kpa, ki khynnah skul, ASHA, ki nongtrei Anganwadi, nonghikai, ki nongïalam shnong bad kiwei kiwei.

Ka Wanbait Tang kaba pynïaid ïa kane ka campaign ka jingthmu ba pynlong ïa kane ka prokram kalong ban kyrsiew kyntiew iaki nongïalam shnong ki shnong ban kyrshan ïa ki khynnah kiba don jingduna haka bor met bor pyrkhat ban pynshlur ïaki ban leit sha skul khnang ba kin lah ban ieng hala ki jong ki kjat.

“Kane ka campaign We Ring The Bell Campaign ka dei kaba la sdang daka ‘Liliane Foundation’ kaba ïakhun bad ïalap ban pynïph jingnang jingstad ïa ki longïing kiba duna haka ioh ka kot bda kiba duna haka bor met ne kiba anna naduh u snem 2012,” la ong ka kong Wanbait. Kala ong shuh shuh ba kane ka campaign kala pynktik iaki ba bun naduh ki khynnah skul, ki longkmie longkpa bad shimbynta ha kane ka campaign bad pynrung skul ïaki khynnah kiba duna.

Bun ki khynnah kiba don jingduna kim ïoh ka lad ban leit skul namar kiba bun ki jingeh kaba ki ïakynduh haka imlang ka sahlang naduh ka jingbym don ki lynti syngkien kiba paka ba kin suk ban ïaid ban ieng, ki skul kim treh ban pynïakhleh lang ïa kum kine ki khynnah nalor kiwei kiwei, hynrei lyngba kane ka campaign bad katkum ka hok ban ïoh jingnang jingstad (Right to education) ka sorkar India lyngba Sarva Shiksha Abhiyan (SSA) kala plie lad ïa baroh ki khynnah ban leit skul khlem donkam ban siew eiei.

“Ba kine ki khynnah kiba duna kin ïoh ka lad ban leit skul, lyngba kane ka campaign ngin pynduh ïaka jingpep skul shiteng por bad ban ïakhun ïaki jingduna haki skul da kaba pynbiang ïaki kamra klas ban pynktik ïaki khynnah bad rung skul, ban pynbiang ïaki jaka leit shabar, ki lynti ban ïaid ki khynnah ba anna da kaba ïatreilang bad ka bor pynïaid skul bad ki kmie ki kpa,” la ong ka kong Wanbait.

Ha kane ka campaign la pynlong ïaki jinglehkai bad jinghikai ba har rukom ban pynshlur ïaka kmie ki kpa bad ki khynnah ban phah skul ia ki khun ki kti jong ki. La pynlong ruh ïaka jingpyrta, da kaba thap kti bad tied iaki tiar kum ka pliang bad kiwei kiwei ban phah ïaka khubor sha kiba nongmihkhmat, ki nonghikai bad kiwei kiwei ki riew pawkhmat bad kiwei kiwei ba kin shimkhia ban pynjan iaki skul sha ki shnong khnang ba kine ki khynnah kin ioh ban leit skul.