Ïashimbynta u Myntri Rangbah ha ka jingïalang ba 54 jong ka Meghalaya Koch Association  

Syllad | The Rising MeghalayaFebruary 4, 2024

U Myntri Rangbah ka jylla u Conrad K Sangma u la leit ban ïashim bynta ha ka jingïalang ba 54 jong ka Meghalaya Koch Association. Kane ka jingïalang ka dei kaba la pynlong ha Jatrakhona, South Garo Hills, Meghalaya haka 3 tarik Rymphang.

Ha ka jingkren ha katei ka sngi u Myntri Rangbah u la ai jingïaroh halor ka jingpyrshang jong ki nongïalam bad ki dkhot ka Meghalaya Koch Association hapdeng ba ki la lah ban pynlong kane k jingïalang ha kine ki 54 snem kynthih. “Kane ka pyni shynna halor ka jingieid bad jingaiti na ka bynta ka imlang ka sahlang jongphi”, ula ong bad kyntu kynpham ruh ïa ki ban bteng kum kane ka jingïalang lait nangta ruh ban long kiba hakhmat ban ai jingïada ïa ka jingithuh paw jong ki Koch khnang ba lah ban bteng ki matti bakordor ïa ki jinghikai ki mynbarim, ki jingngeit, ki riti, dustur ba lah ban nangpynskhem ka jinglong tylli kawei bad long ka jingsarong na ka bynta ka Ri.

Na ka liang u Myntri Rangbah u la ong ruh ba kum kane ka jingïalang lait na ka jingpyni nam halor ka long ka man jong ki Koch ha ki sngi ba la leit noh ka dei ruh kaba pynshlur halor ka jingtip ba markyliang ha kaba ïadei bad ki lariti bad wanrah ka jingsngewthuh halor ki lariti bapher bapher kiba don ha ka jylla. Ha kane ka sngi u la pynbna ba ka sorkar kan ai jingkyrshan ban shna ka jaka pdeng ba ïadei bad ka lariti khnang ba lah ban ai jingīada bad pynneh pynsah ïa ki riti dustur jong ki.

Ha ka jingpdiang sngewbha ruh ïa ka jingai jingmut jong ka Meghalaya Koch Association ban kyntiew ka ktien jong riewlum kum ki Koch, Hajong napdeng kiwei ha ka jaka ka ktien Assamese bad Bengali u Myntri Rangbah u la ong “Wat ha ka kyndon treikam jong ka New Education Policy la kdew ba ka long kaba donkam ban ithuh bad ki kyntiew ki ktien jong ki trai ri trai muluk, hapdeng ka jingkhmih ba kane kan nang pynriewspah shuh shuh ïa ki ktien tynrai jong ka ri India”, bad u la ong ruh ban ïarap ïa ka Koch  Association khnang ba lah ban pynurlong bad pynpoi ïa kane sha  ka thong.

Ha kane ka sngi la don lang da u MLA, Salmanpara, Ian Botham K Sangma, MLA, Baghmara, Kartush R Marak, MLA, Chokpot, Sengchim N Sangma kynthup ruh ki MDC na kine ki thaiñ.