Ïasoh ki nongïalam bad dkhot ka AJSU sha ka JSM ban wanrah jingiatylli para samla

Syllad | The Rising MeghalayaJune 9, 2019

JOWAI: U Pillar Stone Phawa, General Secretary ka All Jaiñtia Students Union (AJSU) ula ong ba ka jingpyniasoh biang jong u sha ka seng Jaiñtia Student Movement (JSM) ka long ha ka nongrim ba u kwah ban wanrah ka jingïatylli hapdeng ki khun samla kiba kwah ban trei na ka bynta ka miat ka bha jong ka jaidbynriew.

Ïa kane ula ong haka jingialang pyniasoh jong u ryngkat bad ki dkhot bad nongialam ka AJSU na Shangpung Unit, Nartiang Circle, Jowai Circle, Mudop Unit kiba la pynïasoh ïalade sha ka JSM haka sngi Saitjain haka jingialang kaba long ha ïingdorbar ka shnong Khliehmyntriang, East Jaiñtia Hills District.

“Ki Seng bhalang kila nang nang bun ha rilum Jaiñtia, pynban ka jaidbynriew kala nang nang shah ktah haka jinglong jingman tynrai jong ngi bad ka jingma ka ap lada ngim ia tylli ban ieng kawei ban iada iaka jaidbynriew,”, la ong u Pillar bad bynrap ba haka jingiohi jong u ka jaidbynriew jong ngi kam slem shuh ban shah tyllep ha ki nongwei la haka khaii ka pateng, ka kolshor, ka riti ka dustur bad ula ong ba ka daw ba u rung ban pyniasoh sha ka JSM ka don ki nongialam kiba don ka mynsiem rangbah kiba sngewthuh ban kit ban bah na ka bynta ka iap ka im ka jaidbynriew.

Ha kane ka sngi la pynkha ïaki tnad treikam jong ka JSM kaba kynthup ïaka Nongdhar Unit, Lapangap Unit ( Adhoc) bad Ka War Jaintia Circle.

Ïa ka jingialang ban pdiang ïaki nongialam bad dkhot ka AJSU la pynïaid da u Publicity Secretary JSM u Skhembhalang Dkhar bad ïaka jingkular la shim da u President JSM U Ma Leningstar Rymbai.

Ha kane ka sngi la ïoh ruh ka jingkren na U General secretary JSM u Ma Edie Lamare, na U Ardipaul Rymbai Chairman ka JSM Social Cell , na U Shnalad Rymbai President JSM eastern region bad kiwei kiwei.