Iasoh u nongialam barim ka FKJGP bad editor U Rupang sha ka UDP

Syllad | The Rising MeghalayaAugust 17, 2022

Ka United Democratic Party (UDP) kala pdiang  sngewbha  iaka jingwan pyniasnoh jong ki arngut ki riew ba pawkhmat jong ka jylla, katta ia u nongialam barim ka Federation of Khasi Jaintia & Garo People (FKJGP) u bah Wellbirth Rani ryngkat bad u vice president ka Pynurlsa Circle ka seng  NPP ba dei artad u President ka Meghalaya Editors & Publisher Association (MEPA) bad trai ka kot khubor u Rupang u bah R Monarch Shabong.

Ia ka jingpdiang burom ia kine ki arngut ki riew pawkhmat la pynlong syndon da ka jingialang kaba la long ha iing sah jong u MLA ka Shella Constituency u bah Balajied Synrem.

Ha kane ka jingialang ym tang ba la wan ban pyniasnoh da u bah Wellbirth bad u bah Monarch, pynban la wan ban pyniasnoh lang ruh ryngkat bad ki nongbud ne ki nongkyrshan jong kine ki arngut ki riew pawkhmat.

Na ka liang u bah Wellbirth lei lei ka jingwan pyniasnoh ka jong u sha ka UDP ka dei ryngkat ka jingia synran lang da ki dkhot ka seng kmie ka FKJGP ba mynta.

Na ka liang ka UDP nalor u President ba Rangbah katta u bah Metbah Lyngdoh, la sakhi lang ia kane ka jingwan pyniasnoh jong kine ki arngut da u bah Paul Lyngdoh MDC ba dei artad u EM KHADC, bah Eugeneson Lyngdoh MLA Mawphlang, nangta u MDC ka Shella u bah Teinwell Dkhar, la don lang ruh u General Secretary ka party u bah Dr Jemino Mawthoh, Kong Preety Kharpyngrope nongialam jong ka seng kynthei ka UDP. Ia ka jingialang la pyniaid da u bah Titostarwell Chyne CEM bad District President ka UDP.

Ha ba kren ha kane ka jingialang na ka liang u bah Monarch bad u bah Wellbirth, ki pynpaw ia ka mynsiem ba sngew kmen ba ha kum kane ka sngi, ba ka UDP kan pdiang ia ka jingkloi ka jong ki ban iatrei lang noh bad kane ka party.

Nakaliang ka jong u bah Monarch haba kren ha kane ka jingialang u pynpaw ba balei ka ktik palat ia u ban wanphai biang noh sha kane ka party, ka daw bah hi ka long ba ha ki katta tylli ki snem, kaei kaba u shem bad iohi ka long ba man la ki mat kiba ktah ia ka jylla, ki kam ki shu sah beij kumjuh kampher lada dei haka liang ka kam u pud u sam, ka kam jong u dewiong bad kiwei kiwei.

Katba na ka liang u bah Wellbirth, u pynpaw ba ka jingwan ban pyniasnoh ka jong u kadei ba u iohi ba kane ka party ka don ia ka jingiatylli bad kaba lah ban leh shibun bah ki kam lada ka ioh ia ka lad ban shong ha ka khet jong ka jingsynshar.

Haba ai jingkren ha kane ka jingialang u bah Metbah u ong ba kumba ka long mynta hapoh ka party UDP ka don ka jingiatrei bad ka jinglong kawei namar khlem kane ka mat ia treikam da lei lei yn nym lah ban poi sha ka thong.

U bah Metbah u ong ba  kum ka party ka pdiang ia u bah Monarch bad Wellbirth da ka jingsngewkmen bad khmih lynti ba kin ai ia ka kti kamon ka kti kadiang sha kane ka kynhun ba mynta jong ka party, ia kaba u la ong ruh ba shen kum ka party kan sa khreh ba kan bynshet ne ban sa tynrong ne ban sa ai ia ka lyngkor ha kine ki arngut ban ia kit lem ia ki kam nangne shakhmat.

U Bah Metbah u la ong ruh ba da lei lei um kwah ban ia treilang bad ki briew kiba ong ba mynta da ioh tang 16 17 ne 20  ngut ruh ka la biang, pynban u la ong ba u kwah ban ia trei bad ki briew kiba buh ha ki ia katta ka thong ba ha ka election kaban wan kum ka party ka dei ban ioh 30 ngut ki kyrtong ki ban jop, ha kaba u ong ba u da sngew smiej ban ia trei bad ki briew kiba ong  tang khyndiat katno tam lei lei ban shaniah ha ki.

Pynban u bah metbah u la ong ba shisien ba la mut ban ia khun ia ka kam dei ban kut jingmut beit ban lah ban kynjoh sha ka thong.