Iasoi MoU ka DoNER, NEC bad IIM ban pyniaid shakhmat ia ka jingtreikam ka Dr. APJ Abdul Kalam Centre 

Syllad | The Rising MeghalayaFebruary 15, 2024

Ka NEC Shillong ha ryngkat ka IIM Shillong bad ka Tnat DoNER haka 13 tarik Rymphang kila ia soi ia ka MoU na ka bynta ban bteng ban pyniaid shakhmat ia ka jingtreikam jong ka APJ Abdul Kalam Centre for Policy Research and Analysis ha ka jingialang kaba la long hapoh NEC Secretariat.

Ia kane ka MoU la soi da u Angshuman Dey, Joint Secretary MDoNER , u Moses K Chalai, Secretary, NEC bad u Prof DP Goyal, Director, IIM Shillong ha ka jingiadon lang u Chanchal Kumar, Secretary, MDoNER lem bad kiwei pat ki heh sorkar ka DoNER, NEC bad IIM Shillong.

Ia kane ka Centre la thaw lyngba ka jingiamynjur hapdeng ki laitylli ki kynhun ha ka 15 tarik u Risaw 2016, kata da ka jingthmu ban kyntiew ia ki jingtreikam jong ka center ban iarap ia ki jylla ka thain Shatei lammihngi jong ka ri (North East India) bad ia ki agency kiba pynkhreh ia ki plan bad pyntreikam bha ia ki polisi bad kyntiew ia ki jingshem kiba thymmai hapoh ka thain.

Haba kren ha ka jingialang u Prof D P Goyal, Director, IIM Shillong u la pynpaw ia ka jingkmen haba pynkynmaw ia ki kam ba khraw jong u President barim ba la khlad noh u Dr. A P J Abdul Kalam bad halor ka jingiohi jngai ka jong u ban kyntiew ia ka roi ka par.U la bynrap ruh ba ka jingbteng ban iasoi ia ka MoU kan nangpynkhlain shuh shuh ia ka jingiadei hapdeng kine ki laitylli ki kynhun kiba kongsan bad kan nangpynkhlain ruh ia ka jingkut jingmut ban kyntiew ia ka roi ka par jong ka thain North East.

Kumjuh u Moses Chalai, Secretary NEC u la pynpaw ka jingsngew hun kumno ba kane ka centre ka la kiew shakhmat kumba la khmih lynti.Nalor kata u la pynpaw ruh ia ka jingkmen halor ka jinglah ban pyndep ia ka jingtei na ka bynta ka jaka treikam jong ka Dr APJ Abdul Kalam Centre ia kaba la bei tyngkas da ka Ministry of DoNER lyngba kas NEC. 

Katba na ka liang u Chanchal Kumar, Secretary, MDoNER u la pynpaw ia ka jingkyrmen kaba skhem na ka bynta kane ka centre ha ryngkat ka jingkhmih lynti ba kan kylla long Kawei na ki jaka saindur ba kongsan jong ka thain.Nalor kata u la pynpaw ruh halor ka jingdonkam ban sdang ia ka North East Development Fellows lyngba ka Dr. Kalam  Centre na IIM Shillong khnang ban wanrah ka jingkylla haka rukom treikam bad jingshakri ia ka thain.U la pynthikna ruh halor baroh ki lad jingiarap na ka DoNER na ka bynta ban kyntiew ia ka centre.

U Atul Kulkarni, Member, Board of Governors, IIM Shillong uba la iashim bynta lang ha kane ka prokram lyngba ka kor internet u la pynpaw ia ka jingkongsan jong kane ka centre na ka bynta ban pynurlong ia ki jingangnud jong ka thain, kata la ka long ha ki jingtreikam Lajong, ha ka pule puthi, jingkyntiew ia ki polisi ne training bad ka jingiarap ia sorkar jylla ban ai ia ka jingshakri kaba bha tam.

Nalor kata ka thong jong ka centre ka long ban   saindur ia ka pyrkhat pyrdaiñ na ka bynta ka thain North East lyngba ka jingpyndonkam ia ka rukom treikam kaba bha tam ban ai ia ki jingtip kiba paka na ka bynta ban pynneh pynsah ia ki jingdon jingem bad ka rukom pyndonkam ia ki hapoh ka thain North East.