Iasuk ki nongshong shnong ka Ratacherra hadien 6 snem ba iapher jingmut na ka skim sorkar

Syllad | The Rising MeghalayaOctober 11, 2020

Hynriew snem hadien ka jingiapher jingmut jong ki nongshong shnong ka Ratacherra, East Jaintia Hills tang na ka bynta ka skim sorkar, kata na ka skim pynpoi umbam umdih hapoh shnong kaba la poi ruh shaduh ka iinglieh iingsaw kila poi shaka jingiasuk bad ia map markylliang bad rai ban iaklet ia kiei kiei kiba jia shadien.

Ka daw bala poi shaduh ka jingïapher jingmut kadei halor ka jingsngewthuh bakla ïaki rukom pynïaid shnong kynthup naduh ka jinglum ia u synñiang shnong bad ki jingshna ïaka surok sam umbam umdih.

Kawei na kine ki kynhun ki long ki nongshong shnong kiba shaniah tylli tyllup haka jingïalam jong ka Dorbar Shnong Ratacherra, katba kawei pat ka kynhun la ïalam da u Bah Worly Pohiing kala ieng pyrshah iaka jingbeit ka shnong.

Kila poi sha ka miej jingïakren namar ka jingshim khia jong ka Dorbar Shnong Ratacherra kaba la phah ïaki shithi ban wan ïakren ïasuk noh bad na ka liang kiba pyrshah Shnong ki la pdiang hun ïa kata ka jingkhot jong ka Shnong bad ki kwah noh ban poi shaka jingïatylli bad ïasuk.

Kine ki ar liang mamla, ki la ïarai ban ïasuk noh ba kin iaklet noh ïa kaba la dep jia ha ki snem ba la dep shadien bad ban sdang da ka jingïadei kaba thymmai na ka bynta ka bha ka miat jong ka Shnong ka thaw.

Ki arliang mamla kiba la kloi ban ïasuk noh na bynta ka bha ka miat haka 2 tarik Risaw la pynlong ïaka jingialang kaba kyrpang ha madan phutbol jong ka shnong haka jingïadonlang ki nongkitkam jong ka Elaka Narpuh ba kynthup ia u Dolloi u Manbha Kyndoh, u Sibren Sumer Secretary Elaka, u Jerimaia Dhar Finance Secretary Elaka bad u Bah P Syih Vice Chairman Elaka haka jingialang kaba la pyniaid da u Bah Faires Pohshna Chairman Shnong.

“Ngi la poi shaka jingiasuk haka 17 tarik Nailar ha kaba ngi la wan shaka miej jong ka jingïakren iasuk khnang ban pyntyllun ïaki kam shnong kam thaw bad ban wanrah ïaka shongsuk shongsaiñ, ka bha ka miat bad ka imlang sahlang kaba lah ban ïa sngewthuh jingmut bad baroh khoit ki nongshong Shnong, ong u Desous Pohshna Waheh Shnong Ratacherra.

“Kum ki briew ngi don ka jingtlot hynrei U Blei haki 6 snem ba shadien U khlem ïehnoh ne lyndet ïa ngi, hynrei ïai phai bad khmied sha ngi kat haduh ba Ula pynpoi ïa ngi shaka jingïasngew thuh jingmut bad jingïasuk khnang ba ngin lah ban tynrong ïaka shnong haka lynti kaba bha kaba lah ban poi shaka burom”, ong u Bah Desous Pohshna.

“Ngam pat ju kmen haka jingim kumba nga kmen haka por ba nga ïoh pdiang ïaka shithi ïasuk, nga pule ïaka man ka miet bad hadien ba la dep ban pule nga ïohthiah hun mynsiem bad kane ka sngi ka long ka sngi sah kynmaw iaka shnong Ratacherra,” ong shuh shuh u Bah Pohshna.

Haka jingpynïaid shnong bun ki lait ki let hynrei ula kyntu ïaki nongshong shnong haba shem ïaki lait ki let dei ban ïakren pynbeit ym ban khñium namar ka jingkren pynbeit ka lah ban wanrah ïaka bha ka miat jong ka Shnong ka thaw.

Naka liang ki nongkitkam ka Elaka haka jingkren ki la pynpaw ba ka sngi ba ïasuk jong ka Shnong Ratacherra kadei ka sngi kaba kmen tam ïaka Elaka Narpuh.

“Ngi duh thiah duh dem bad pyrshang ban weng ïaki jingeh hapoh ka Shnong Ratacherra hynrei da ka jingïalam bastad jong U Kynrad ka jingsuk ka la wan hapoh ka Shnong Ratacherra”, ong u Dolloi Manbha Kyndoh.

Ula kyntu ïa baroh arliang mamla ban weng lut ïa baroh ki jingujor ba la phah mar kylliang sha baroh ki tnad sorkar bad na ki arliang mamla ki la kular ban leh ïa kata. Ula kitbok kitwriang ruh ïa baroh ki nongshong Shnong kumjuh ka Shnong ba nangne shakhmat da ka jingïatylli para nongshong Shnong kan kiew ha baroh ki liang.