Iasylla ki politician bad ki heh saipan haka jingkhaii dieng tuh ha khappud Assam Meghalaya: Chandame

Syllad | The Rising MeghalayaNovember 26, 2022

U Chairman ka Hynñiewtrep Border Disputes Redressal Forum (HBDRF) u Chandame Sungoh ula ong ba ka jingjia ha Lumpalang ha Mukroh ka jaka ba jia ka jingshah siatiap ki 5 ngut ki nongshong shnong ha Mukroh bad uwei u nongtrei forest guard ka Assam ka dei ka jaka kaba la kyntur pud ka Assam.

“Kane ka jaka ha Mukroh dei kaba la kam trai ka Assam bad kala buh ruh iaka Forest Check Gate ka Assam bad bun sien ki nongrep ka shnong Mukroh ki shah pyndik ha kane ka jaka bad tang shu lait na kane ka khyrdop, ki nongrep ka shnong Mukroh kila shah kynnoh beit ba ki dei ki nonglute, ki nongtuh dieng, nongtuh sla haka Assam,” la ong u Chandame haba kren haka rally kaba la pynlong da ka JAC Rilum Jaintia kaba long haka sngi Saitjain ha Jowai.

Ka JAC Rilum Jaintia kaba kynthup iaka AJCVA, MPUF, JYF, HNPF, HWW&DO, RJTA, HANM, NHP, MPUF Women wing bad ka HBDRF. Ia kane ka rally la sdang naduh na Lad Nartiang haduh Iawmusiang.

Haba kren shuh shuh u Chandame ula kubur ruh ba ka don ka jingkhaii dieng tuh bad ka kit dieng ha khappud Assam Meghalaya ha Mukroh bad kane ka jia long namar ka jingiasylla ki politician bad ki heh saipan

“Ki briew ki jong ngi, ki politician bad ki heh saipan bad kiba don ka lad lynti kileh ia kine ki kam beaiñ. Ka kam khaii dieng hi ka long beaiñ ha Assam bad Meghalaya ka jyllei bad ki nongthied ruh ki don bad ki nongdie ruh ki don,” la ong u Chandame. Ula ong ruh ka jingjia siat pathar u Pulit Assam iaki jaidbynriew ha Mukroh haka 22/11 ka dei kaba bakla bad kumno ki nud ban rung shapoh Mukroh ban shim jubor iaki jingim briew.

Baroh ki nongkren ha kane ka rally kila pynrem iaka jingjia ha Mukroh bad dawa na ka sorkar ban ai ka jingbishar kaba hok bad ban pynbeit ia u pud u sam ka jylla bad dawa kem mardor iaki pulit kiba donkti ban siat iap iaki nongshong shnong ka Mukroh.