Iateh ka tnat Tourism bad ka Shillong Lajong FC na ka bynta ka jingialehkai I-League 2023-24

Syllad | The Rising MeghalayaNovember 3, 2023

Ka Shillong Lajong Football Club ka pynpaw ka jingkmen ban pynbna ia ka Tnat Tourism ka Jylla Meghalaya kum ka nongbei tyngka ne ka sponsor na ka bynta ka jingialehkai  I-League 2023-24.

Ka Lajong kan iashim bynta ha kane ka I-League hadien saw snem kynthih. Kane ka kynhun ha ka jingialehkai kaba nyngkong pyrshah ia ka Mohammedan Sporting Club ha Kolkata haka sngi Thohdieng kala iakhaid mar 1-1.

Katba ha ka jingialehkai ka ban wan ka Lajong kan iakhun ha la ka jong ka jaka hapoh Shillong ha SSA Stadium ha ka 9 tarik mynta u bnai pyrshah ia ka Neroca FC na Manipur.

Na ka liang u Bah Habamutlang Lyngdoh, General Manager ka SLFC u la ong; “Ka Lajong ka pynpaw ka jingkmen ban ioh ia ka lad ban pyniasoh bad ka Tnat Tourism ka Meghalaya kum ka nongbei tyngka na ka bynta kane ka jingialehkai I-League 2023-24. Kane ka dei ka khyllipmat kaba kmen na ka bynta jong ngi ban pyniasoh ha kane ka rynsan ialehkai football kaba jwat tam hapoh ka ri sa shisien pat. Da ka jingkyrshan jong ka Tnat Tourism ka jylla, ngi don ia ka thong ban kyntiew shuh shuh ia ka kam ialehkai sports ha ka jylla jong ngi bad ban pynneh ia ka jingiashim bynta jong ka Shillong hapoh ka National League bad ruh ban kyntiew ia ka jylla ha ki kam ialehkai football hapoh ka ri.”

Nalor kata u la ong ruh; “Ngi ai ka jingkhublei kaba kyrpang ia u Myntri Rangbah ka jylla u Conrad K Sangma bad ia u Myntri ka tnat Tourism u Bah Paul Lyngdoh halor ka jingkyrshan bad ka jingshaniah ha ka Shillong Lajong FC. Ngi kyrmen ba ngin lah ban noh synniang na ka bynta ban kyntiew shuh shuh ia ka jylla Meghalaya ha kaba iadei bad ka sport.”

Ka Lajong ka don ia ka jaka kaba kyrpang ha ka histori jong ka jingialehkai football hapoh ka thain North East India. Kane ka club ka la pawkhmat nyngkong eh ha u snem 2009, kata da kaba kylla long ka kynhun ne team kaba nyngkong eh na ka thain North East ban ioh jaka hapoh ka lympung national football. Da ka jingiadon bynta lang jong ka Tnat toursim ka jylla, ka Lajong kan lah ban bteng ban rah ia ka nam ka burom bad kan pynshlur bad aimynsiem ia ki khynnah don sap ha ka jylla.

“Ka jingiatreilang bad ka Shillong Lajong FC ka iaid ruh ryngkat bad ka jingthmu jong ka Meghalaya Tourism ban kyntiew ïa ka Meghalaya ha ka kam jngohkai pyrthei. Ki kam ialehkai sports khamtam ka phutbol ka long kawei ki bynta ba lah ban khring ia ki briew na shabar sha kane ka jylla. Da kaba kyrshan ia ka Lajong ha kane ka I-League samoi 2023 24, kan lah ban pynpaw shuh shuh ia ka jingitynnad jong ka jylla bad ia sap ha ka liang jong ka sport da kaba pynleit jingmut kyrpang ruh na ka bynta ban kyntiew ia ki kam jngohkai pyrthei ha ka jylla.

Shuh shuh kane ka jingkyrshan jong ka Tnat Tourism ka Meghalaya ym tang ba kan kyntiew ia ka club hynrei kan iarap ruh ban kyntiew shaphrang ia ka phutbol hapoh ka jylla.