Iateh soskular ka Rangdajied United FC bad ka Bengaluru FC ban kyntiew ia ka phutbol

Syllad | The Rising MeghalayaSeptember 6, 2024

Ka Rangdajied United Football Club ka la wan shakhmat ban iasoi ia ka soskular ia teh paralok bad ka Bengaluru FC shi bynta jong ka thong ban kyntiew ia ka kam ialehkai phutbol.

Ia ka soskular hapdeng kine ki arliang mamla la soi ha kaba shit kaba shai bad ka jingsakhi jong ki khynnah ialehkai bad ki kmie ki kpa ha ka jigialang kaba rit hynrei kaba shongkun ha ka shlem aijinghikai phutbol jong ka Club ha Pynthorbah.

Ka jingiasoi ia ka soskular ka long ka long hadpeng u bah Eugeneson Lyngdoh na ka liang ka Rangdajied United Football Club bad u Darren Caldiera uba la wan ban mihkhmat ia ka Bengaluru FC.

Ha kane ka sngi la sakhi ruh ia kane ka jingiasoi soskular da u bah Aiborlang Khongjee, bad ka kynhun hi baroh kawei.

Ka thong ba kongsan jong kane ka jingiasoi ia kane ka soskular hapdeng kine ki arliang mamla hi ka long ba ha kine ki lai snem kin don ki kato katne ki kam kiba kine ki artylli ki klob kin iatreilang bad ban kyrshan iwei ia iwei.

Ha kaba nyngkong eh ka soskular  kaba la iasoi ka long ba ki khynnah rit ba don sap ha ka phutbol kam pher lada dei kynthei ne shynrang kin lah ban ioh ia ka kabu ksiar ban leit ban shah pyntbit shuh shuh ialade sha ka shlem ai jinghikai jong ka Bengaluru FC.

Nalor katta ka Rangdajied United FC, ka kloi ruh wat ba kan pyllait ia samla ialehkai lada jia ba u la tbit bha ba un leit ban ialehkai na kane ka club.

Nalor katta, kan don ruh ka jingiasam ia ka jingnang jingtip bad ki coach, khamtam ia ki coach ka Rangdajied kiba lah ban ioh ban leit pyntbit ne ban shah pyntbit janai ka kam ka jong ki bad ki coach ba dei na ka Bengaluru FC.

Kane ka soskular kaba la iasoi hynne ka sngi 5 tarik Nailur lah ban ong ba ka long kum kawei na ba ki soskular kaba i don shisha ia katta ka thong bad kumjuh ka jingkyrmen kaba khlem kano kano ka jingartatien ha kine ki lai snem ki ban wan.