Iatreilang ka Ryntih Sports Club bad ka Minerva Punjab FC ban seng iaka Football Academy ha Jylla

Syllad | The Rising MeghalayaJanuary 11, 2022

Ka Ryntih Sports Club bad ka Minerva Punjab FC, ki la poi sha ka miej ba kin ia soi iaka soskular ia dei kam dei jam ka jong ki, da kaba ki arliang ki la kloi ba kin ia pdiang ne ban seng ia ka shlem ai jinghikai phutbol, ka Football Academy hapoh ka shnong Diengpasoh, East Khasi Hills District.

Ia kane ka soskular iatreilang hapdeng kine ki arliang mamla, la ia soi ia ka hynnin ka sngi u Blei ka 9 tarik u Kyllalyngkot 2022, ha kaba na ka liang ka Minerva Punjab FC la mihkhmat ban soi ia ka soskular da u General manager ka klob u Harshit Tyagi bad na ka liang ka Ryntih FC, la mih da ki nongkitkam ka klob ryngkat ka jingia synran lang ka jong u MDC ka Mawlai Constituency u bah Teibor Pathaw bad u BDO ka Mawlai/Mylliem C&RD Block u bah Tremi Passah bad u bah Ransom Sutnga.

Haba iakren bad ki lad pathai khubor ha Shillong Press Club hynne ka lah sngi u Blei, u Harshit Tyagi General manager ka Minerva Punjab FC, u dap da ka mynsiem kaba kmen ba un shem bad iohi ia ka jinglong ba kloi jong ki bor ba dei khmih ka Ryntih SC, ban shim ia kane ka kabu ksiar ban iatreilang ryngkat bad ka kane ka klob kaba dei na sor bah Chandigarh.

U Harshit u la ong ruh ba ka klob ka la shem ba don hi kumno ba ka kynhun ialehkai ka Ryntih SC ka la dep ba kan aireng sha ka lympung iakhun jong ka second division I League ba la long ha u snem ba la dep, kaba la lah ban leh ia ka kam bah kaba khraw hapdeng ki jingeh bad ki jingduna kiba la ker tawiar ia ka bad kaba ia syriem thik kumba la leh da ka Minerva Punjab FC.

U CEO ka Ryntih  SC u bah Samran Syiem, u la ong ba ka daw kaba la pynlong ia ka Ryntih SC ban poi sha ka miej ban soi ia kane ka soskular bad ka Minerva Punjab FC ban tei ia ka shlem ai jinghikai kaba paka ha ka liang ka phutbol ka dei hadien ba ha ka sien pyrshang kaba nyngkong, ka Ryntih kam shym la lah ba kan kynjoh sha ka thong ban ioh ban iuh kjat sha ka kyrdan iakhun jong ka I. League, kampher wat hadien ba na ka liang ki rang ialehkai ki jong ka, ki la aiti met bad mynsiem.

Wat lada ka klob kam shym la kynjoh sha katta ka thong ba ka angnnud, pynban ka mynsiem iakhun bad aiti ne len lade jong ki player bad ki nongpyniaid jong ka Ryntih SC, ka la plie lad pat ia ka ba kan ioh ba kan kren ia pynbeit kam bad uwei na ki heh saipan ba don ia la ka klob ialehkai ha ka ri u Ranjit Bajaj, ha kaba ula phah wan ia ki nongkitkam jong ka Ryntih SC sha Chandigarh ban iakren ia pynbeit markhmat ia ki kam ki jam bad u.

Ka thong ba ka Ryntih ka la thmu lyngba ka jingsoi ia kane ka soskular hi ka long ba kan lah ba kan kyntiew ne ban rah shalor  bad na ka liang u Ranjit Bajaj, u la kular ba ma u hi un sa wan ban jurip bad khmih hi da la ki jong ki khmat ia ki kam ki jam baroh.

Shuh shuh u bah Samran u la pynshai ba kane ka jaka ba ka Ryntih SC ka ioh ba kan pyndonkam, ka dei jong ka dorbar shnong ka Deingpasoh ha kaba ka la don ka jingiateh ia ka sokular , da kaba la aiwai kumba 40 snem bad ka shnong ka ban shah sngewbha ia ka Ryntih SC ba kan pyndonkam ia ka, kum kawei na ki shlem ai jinghikai phutbol ba kynsai ha ka jylla da ka jingiatreilang ryngkat bad ka Minerva Punjab FC.