Iatreilang ki kynhun ban pynsngewthuh halor ka jingpang HIV | Rah u Maximillia Chullai bad ki paralok iaka iakop rwai folk

Syllad | The Rising MeghalayaMarch 11, 2024

Ban ialap iaka jingshyrkhei bad jingma ka jingpang HIV/AIDS, ka Link Worker Scheme, SURE lyngba ka jingkyrshan ka Meghalaya Aids Control Society (MASC) ryngkat ka Thomas Jones Synnod College ki la pynlong ka jingiakop rwai tynrai bad Phawer ha Hall ka Thomas Jones Synod College, Jowai haka 9 tarik Lber.

Ha kane ka sngi la donlang ka Kong DV Lyngdoh Additional Deputy Commissioner, West Jaintia Hills District kum ka kongsan, ka District Medical & Health Officer, West Jaintia Hills District Dr. Evalyneda B.V Laloo, u Principal Thomas Jones Synod College Dr. DG. Lyngdoh, ki nonghikai bad ki nongiashim bynta.

Ka kongsan ka Kong DV Lyngdoh ka la ong ka jingpynlong ia kiba kum kine ki awareness program ka long kaba donkam shibun namar ki paidbah ki ioh jingshai bad nalor ki jingshai ba ki ioh, ki lah pat ban iada ialade na kane ka jait jingpang. Kala ban jur ruh iaka jingdonkam ban ioh iaka jingkoit jingkhiah namar ka pynkiew iaka Shnong ka thaw, ka ri bad ka jaitbynriew.

U Bah S Tariang CPM, (DISHA) haba batai shaphang u khniang HIV ula iathuh ba la lap nyngkong hapoh ri India ia une u khniang jingpang dei ha u snem 1986 ha Chennai jong ka jylla Tamil Nadu. Naduh kitei ki snem kane ka jingpang ka la sar ia ka jingim jong ki briew khlem sangeh haduh kine ki sngi.

Ha kaba iadei bad u khniang HIV hapoh ka Jylla Meghalaya u Bah Tariang ula ong, kumba long mynta ka jylla Meghalaya ka wan haka kyrdan kaba 4 hapdeng ki jylla ka thain shatei lammihngi bad katkum ka jinglum jingtip ki briew kiba im bad u khniang HIV kim duna shuh iaka 8000 ngut shaneng.

Hapdeng ki district kiba don hapoh ka Jylla, ula ong ba ka rilum Jaintia kynthup ka East Jaintia Hills bad West Jaintia Hills District ki long kiba hakhmat haka jingdon jong ki briew kiba kit ia une u kniang jingpang HIV bad katkum ka jinglum jingtip jong u snem 2022-2023 ki briew kiba im bad u khiang HIV ki don kumba 4000 tam ngut.

Ula batai ruh iaka jingsaphriang u khniang HIV, na ka jingshongkha lyngkar, na ka kmie kaba don ia u khñiang jingpang sha i khyllung ba ka pun, lyngba ka jingpyndonkam ia kijuh ki thyrnia haba pyndonkam ia u drok, bad ruh lyngba ka snam.

Kumta ban lait na kaba ioh ia u khniang jingpang HIV u Bah Tariang, ula kyntu ban im ka jingim adkar, ban kiar na ka jingshongkha pathar bad ka jingpyndonkam drok khamtam da kaba injek da kijuh ki thyrnia bad haba shim snam donkam ban ioh iaka snam kaba khuid bad ka bym don ia utei u khniang jingpang.

Kiwei de kiba la aijingkren ki long u Bah W. Dohling DD Prevention MACS, u Dr. HH. Mohrmen Secretary SURE, ka Kong B. Lamar Zonal Supervisor nalor kiwei kiwei.

Baroh ki nongkren ki la ong ba u khniang HIV dei uba lah ban iada lada ki paidbah ki ai ka jingiatreilang da kaba pynshlur ruh ban leit Test shaki jaka aijingsumar ban ioh iaki dawai dashin.

Ha kajuh ka por la kyntu ba ymdei ban ibein, kren bein iaki briew kiba ngat ia une u khniang, nalor ba ki shah ktah haka bor met bor phad, ki lah ruh ban shah ktah haka bor pyrkhat pyrdain. Kumba long kiwei pat ki briew, ki ruh ki donkam ïa ka jingieid bad ka jingkyrshan lang jong ki paidbah bad kane ka long kumjuh ïa ki bahaïing hasem jong ki ruh bad donkam ban iakren shaphang ki jingkhuslai jong ki.

Kum ka jingiarap ialade bad ia kiwei ruh kumjuh, ki briew kiba tharai ba ki don iaka jingpang HIV lane AIDS, la kyntu ba kin leit sha ki jaka ai jingsumar lane ki hospital na ka bynta ban test bad ïoh ïa ki jingsumar. U dawai ba ki khot u antiretroviral therapy (ART) u iarap ïaki ban im kham slem.

Ha kane ka jingiakop rwai la shim bynta 10 tylli ki kynhun kiba la rwai shaphang ka jingiada bad jingsaphriang u khniang HIV/Aids.

Ka kynhun rwai kaba khur iaka nam nyngkong kadei ka Maximillia Chullai & Patner ka la ioh iaka song pisa kaba 15 hajar tyngka, ba Ar Ki Mookhuri ka la ioh iaka song pisa kaba 8 hajar tyngka bad ba Lai Luminary Liam (Solo) 5 hajar tyngka.