Iatreilang ki nongrep ka Jylla bad ka YATS na Japan ban pyniaid ia u jhur tit Shiitake sha ki iew ka pyrthei
Ka sienjam ba kongsan kaba thmu ban kyntiew ia ka rep ka riang bad ka roi ka par jong ka jylla Meghalaya ka la wan urlong ha ka 14 tarik Rymphang hadien ba ka Hill Farmers’ Shiitake Mushroom Co-op Soc. Ltd. ka Meghalaya bad ka YATS Corporation na Japan ki la iasoi ia ka soskular ban iatreilang ban kyntiew halor ka jingrep ia u tit Shiitake hapoh ka Jylla bad ban pyniaid sha ki iew ka pyrthei.
Kane ka soskular ba kongsan ka pyni ia ka jingkut jingmut lang ban pyndonkam ia ka bor jong baroh ar ki kynhun na ka bynta ban kyntiew ha ka jingpynmih bad pyniaid iew ia u jhur tit Shiitake. Ka jingiatreilang ka thmu ruh ban plielad ia ki nongrep trai ri ia ka lad ban ioh ia ki iew ki hat jong ka pyrthei, ki rukom rep kiba kham thymmai, bad ki buit jingstad ban pynbha bad pynkhlain ia ka jingpynmih.
Ia kane ka soskular la iasoi ha ka jingialang kaba la long ha Shillong Club lyngba u Yasuhide Ito, President ka YATS Corporation bad u Bah Alfondbirth Kharsyntiew, General Secretary ka Hill Farmers’ Shiitake Mushroom Co-op. Soc. Ltd ha ka jingiadon lang ki dkhot jong ka.
Haba kren ha ka jingialang u Bah Alfondbirth Kharsyntiew u la pynpaw ia ka jingkyrmen kaba skhem lyngba kane ka jingiatreilang da kaba ong, “Kane ka jingiatreilang bad ka YATS Corporaion na Japan ka dei ka sienjam kaba kongsan ban wanrah ka jingkylla lyngba ka kam rep ia u tit Shiitake ha kane ka Jylla Meghalaya. Ngi sngew skhem ba kane ka jingiatreilang kan wanrah ka jingkylla kaba khraw na ka bynta ki nongrep ki jong ngi bad na ka bynta ka thain hi baroh kawei, bad ngi ai khublei ia ka Sorkar Meghalaya bad ia ka Tnad ka Rep ka riang namar ka jingkyrshan ba phylla kaba ki la ai na ka bynta ki nongrep da kaba pynbit pynsuk na ka bynta kane ka jingthmu.”
Nalor kata, ka Hill Farmers’ Shiitake Mushroom Co-op Soc. Ltd., ka Sorkar Meghalaya, bad ka YATS Corporation ka Japan ki la iasoi ruh ia ka soskular lai liang (Tripartite Agreement) hapdeng jong ka, kata ia kaba la dep iasoi nyngkong ha u snem 2019 ban kyntiew halor ka jingrep ia u tit Shiikate hapoh ka jylla. Kane ka jingiasoi soskular ka pynpaw ruh ia ka jingiatreilang jong baroh ki nongiashim bynta ban pynthikna ia ka jingroi bad ka jingjop ha kane ka kam rep bad pyniaid iew ia une u tit Shiikate hapoh Meghalaya.
Ki mat ba kongsan jong ka Tripartite Agreement ha u snem 2019 ki long: Ka jingkyntiew ia ka ioh ka kot kaba neh na ka bynta ki nongrep ha ka jylla; ka jingpynroi lyngba ki jingyniasoh bad jingpyniadei bad ka Iew; ka jingpynbha ia ka rukom pynbiang bad shalan bad ki jingkiew ha ka liang ka teknoloj; bad ka jingkyrshan jong ka Sorkar.
Facebook
Instagram
Youtube
Twitter
Leave a Reply