Iatreilang ki paidbah ka Jylla bad ka sorkar, khang khyrdep ki shnong ki thaw

Syllad | The Rising MeghalayaMarch 21, 2020

Ki nongshong shnong ka Jylla baroh kila ai ka jingiatreilang bad ka sorkar ban khang khyrdep ïaki shnong ki thaw bad ki iew ki hat ban ïakhun pyrshah ïa u khniang coronavirus, uba la ktah ïaki ri bapher bapher haka pyrthei kynthup ka Ri India.

Naduh ki Balang haduh ki committee ba pynïaid iew kila phah u kyrwoh sha ki lad ki pathai khubor nalor kiwei kiwei ruh ban ai ka jingïatreilang ban ïakhun bad ban tem ïa ka jingpur u khniang na uwei u briew sha u uwei pat.

Hynne ka sngi la sakhi ïaki dukan, ki iew ki hat bad ki surok kila kynjah jar jar, kaba ka sorkar Jylla kala pynbna kum ka Coronavirus Awareness Day (CAD).

U Myntri Rangbah ka Sorkar Jylla u Conrad K Sangma ula ong “Ka 21 tarik u Lber, 2020 ngin ia pynlong ia ka kum ka sngi ban pynsaphriang jingtip shaphang ka jingpang Coronavirus ne ka Coronavirus Awareness Day (CAD) ha kaba baroh ki jaka treikam sorkar, ki bank (sorkar bad shimet), ki jaka pule, ki jaka paidbah bad ki iew ki hat kin khanglut, kumjuh ruh yn ym shah ban iaid kino kino ki kali paidbah.”

“Ki nongshong shnong kim dei ban shim ia kane kum ka jingkhang khyrdep ia ka shnong ka thaw; hynrei ban shim ia ka kum ka dak jong ka jingpynsaphriang jingtip bad iada na ka jingsaphriang ka jingpang coronavirus ha ka jylla,” ula ong.

La kyrpad ia baroh ki paid nongshong shnong baieid ka jylla ba kin pyntip sha ki rangbah shnong halor kawan jingwan jong ki ha kine ki 14 sngi ba la leit noh, ba lada phi la leit ne em sha ki ri kiba kane ka jingpang ka la khie, kumta lada don kiba la leit jingleit la kyrpad ia ki ba kidei ban shong ha iing 14 sngi bad kidei ruh ban kiar na ka jingiakynduh briew.

Ka shimpor haduh 14 sngi eiei ba ki dak ki shin jong ka jingshitom kan paw ne kan ym paw, kumta sngewbha ban pyntikna ba phin phikir ia lade bad ia kiwei bad kumjuh ban iada ia kiwei pat bad ia ka shnong jka thaw ka jong phi.

U Rangbah shnong udei ban ai jingpynshai ia ki briew kiba la wanphai na kino kino ki jaka kaba la khie kane ka jingpang bad ba kidei ban pyntip sha ki DC office ha kine ki lai rukom.

• DA KABA PHONE ha u Helpline Nombor 108
• DA KABA PYNRUNG KYRTENG LYNGBA KA ONLINE REGISTRATION SYSTEM ha ka http://meghalayaonline.gov.in/covid
• DA KABA PHONE SHA KA DC OFFICE CONTROL ROOM.