Iehnoh kam ka Prof Sungoh kum ka Pro-VC, tyrwa ban shimti kum ka VC (Incharge) ka NEHU

Syllad | The Rising MeghalayaApril 10, 2025

Ka Prof Sharon M Sungoh ka la aiti ia ka shithi iehnoh kam kum ka Pro-Vice Chancellor bad tyrwa ban treikam noh kum ka Vice Chancellor (In-charge) jong ka skulbah North Eastern Hill University.

Ha ka shithi sha ki bor pyniaid sha Delhi, ka Prof Sungoh ka la ong da kaba khmih halor ka jinglong jingman hapoh kane ka skulbah bad ka jingdawa jong ki kynhun bapher bapher, ka long kaba shem shitom na ka bynta jong ka ban treikam kum ka Pro-Vice Chancellor hapdeng ki jingshah pynbor kiba jur.

“Halor kine ki nongrim ba la pynpaw, Nga jied ban phah ia ka shithi iehnoh kum ka Pro Vice Chancellor bad ba ngan trei kum ka Vice-Chancellor (Incharge) katkum ka hok kum ka professor kaba la rangbah tam katkum ka Status 2(A)(5)(i) jong ka skulbah, ha ryngkat iktiar ban pyniaid ia ki kam ki jam kumjuh ha ka liang ki pisa tyngka bad ka ban long noh mardor,” ka la thoh.

Ka Prof Sungoh ka la kdew ruh halor ki jingeh kaba iakynduh naduh ba u Prof Prabha Shankar Shukla um shym la lah ban wan trei hapoh ka headquarter bad ba ka bor ba la ai ban pyniaid halor ki kam ba iadei ha ka liang ka pisa tyngka ka long kaba duna palat ban lah ban pyniaid ia ki kam ki jam ba man la ka sngi jong ka skulbah.

Ka la ong ruh ba ki jingialang jong ki School Board jong ka skulbah ki la dep kut bad ia ki jingai jingmut dang ap ban ioh ia ka jingmynjur jong ka Academic Council/Executive Council kaba ngam don satia ha ka bor ban pyniaid.

“Ka jingpynrung klas ia ki samla pule ki ban wan thymmai kan sdang naduh ka samoi sdang klas ka ban wan, kumta ka long kaba bha ban wad ia ki lad ki lynti ban pynbeit ia kane ka jingeh kaba don mynta hashwa ban dier ka por,” ong ka Prof Sungoh haba pyntip ba ka skulbah ka la ngat ruh ha ki mukotduma kiba dang sahteng hapoh iingkashari, ka jingpyniasoh bad kiwei kiwei ki mat kiba iadei bad ka pule puthi.