Iehnoh u Mukul Sangma bad 11 ngut ki MLA iaka Congress iasoh TMC

Syllad | The Rising MeghalayaNovember 25, 2021

Ka saiñ pyrthei ha Jylla kala kylla khynniuh hadien ba ki 12 ngut ki MLA Congress haka jingialam u Mukul Sangma Myntri Rangbah barim ka Jylla kila phet noh naka Congress bad iasoh sha ka All India Trinamool Congress (TMC).

U nongialam ka liang pyrshah bad Congress Legislature Party (CLP) Mukul Sangma bad 11 ngut kiwei ki MLA kila phah shithi sha u Speaker ka iingdorbar Bah Metbah Lyngdoh ban pyntip ba kila mih noh naka Congress.

Nalor u Mukul Sangma, kiwei pat ki MLA na Rilum Garo kiba mih naka Congress ki kynthup ia u Zenith M Sangma (Rangsakona), Dikkanchi D Shira (Mahendraganj), Miani D Shira (Ampati), Winnerson D Sangma (Salmanpara), Marthon D Sangma (Mendipathar), Jimmy D Sangma (Tikrikilla) bad u Lazarus Sangma (Chokpot).

Na rilum Khasi-Jaintia ki MLA kiba la phet naka Congress ki kynthup ia u Charles Pyngrope (Nongthymmai), George B Lyngdoh (Umroi), Himalaya Shangpliang (Mawsynram) bad Shitlang Pale (Sutnga Saipung).

Uwei u MLA ula ong ba kila mih noh naka Congress bad mynta ka sngi kin pynbna paidbah halor kane ka jingmih noh naka Congress.