Iehshrah iaka surok kaba pyniasoh iaki shnong na Nartiang sha Shilliang Myntang; mad jingeh ki paidbah

Syllad | The Rising MeghalayaJuly 31, 2024

Ki paid nongshong shnong ka ka thain Shilliang Myntang, Samatan, Thadialong haduh Takhniang, Nongjngi kila pynpaw ka jingsngewkhia namar ba ka Sorkar jylla ka la ieh bein ia ka surok kaba pyniasoh iaki shnong na ka thain Nartiang shaduh Shilliang Myntang da ki phew snem wat haduh mynta khlem don shuh ka jingmaramot ne shna thymmai ia kane surok.

Kane ka surok kaba pyniasoh ia ki ba bun ki shnong naduh Mukroh, Barato, Thngrain, Shilliang Myntang haduh ban poi sha ka Shnong Nartiang, Wahiajer bad Ummulong.

 Kumba long mynta ia kane ka surok la shna tang naduh Nartiang haduh Tahkhniang bad kaba sah baroh shilyter jong ka surok ka long ka ba la jot rathai haduh katta katta. Ki nongshong shnong kiba shong ba sah ha kane ka dong ka thain ki la mad shibun ki jingeh jingshitom khamtam haka leit kawan ka kit ka bah namar ka jingsniew palat jong kane ka surok ba dap tang ki thliew ki syar.

Shuh shuh halor kane kum ki nongshong shnong ki dap da ka jingdiaw mynsiem ba ka sorkar ka khlem phai khmat shuh sha kane ka surok. Kane ka surok ka pyniasoh bun tylli ki shnong ban poi sha ka Hospital PHC Nartiang khamtam ha ka pang ka shitom bad kumjuh ia kiba leit shim dawai na ki jaka sumar.

Kane ka jingsniew kane ka surok ka ba buh jingeh ia ki paitbah ki ba leit donkam sha ka Police Station kaba don ha Nartiang bad nalor kata ki khynnah skul kiba leit pule ha ki skul kiba don ha ka Shnong Nartiang, Ummulong Jowai bad wat sha duh sha Nongbah Shilong bad kiwei ki jaka ki hap iaid lyngba kane ka surok.

Ym tang katta, wat ia ki nongrep kiba leit sha ki iew kiba don ha Nartiang Iewpynsin kaba don ha ka shnong Wahiajer kum ka iew baheh ha poh ka ri Jaintia ki la mad shibun ki jingeh namar ki jingsniew jong kane ka surok ki shem shitom ban pynpoi ia ki mar rep jong ki ha kine ki iew.

Kaba lyngngoh kalong ba ka surok na Mukoi lum haduh Barato la dep shna pynbha bad na Tahkhniang Nongjngi haduh Nartiang, naduh Barato haduh Shilliang Myntang la dep shna da ka Scheme NEC bad ka surok kaba sahteng ka long naduh Shilliang Myntang haduh Tahkhniang haduh Nongjngi. Kane ka bynta jong ka surok ka long ka surok kaba khohruh khohram bad bym long shuh ban iaid da ki kali rit lait noh tang da ki Truck bad ki Dumper.

Halor kane ka jingeh ba ki paitbah jong kitei ki shnong ki ia kynduh jingeh ban iaid lynti lyngba kane ka surok, ki dawa jur bad kyrpad ia ka sorkar lyngba ka tnad PWD kan shimkhia ban pynbha ia kane ka surok namar kane ka surok ba pyndonkam ki piatbah ha ka leit kawan ka pang ka shitom bad ha baroh ki liang.

Ki paidbah nongshong shnong kila kyntu iaka sorkar ban phai khmat sha kane ka surok kaba la jot rathai ban shna pynbha iaka khnang ban myntoi u paidbah ka thain.