Ieng pyrshah ka KSU bad ki bor shnong ia ka jingthmu ban lum khajna ka NHAI ha toll plaza Lumshnong

Syllad | The Rising MeghalayaSeptember 19, 2023

Na ka liang ka Khasi Students’ Union (KSU) EJHD Unit ha ryngkat ki nongialam shnong   ki la pynpaw pyrshah ha kaba iadei bad ka jingthmu jong ka NHAI ban pan jingbit na ka bynta ban sdang lum khajna haka Toll Plaza hapoh Lumshnong katba kam pat lah ban maramot ia ka surok kaba la jot rathai.

Kane ka jingshim rai ka la wan long ha ka jingialang kaba la long mynta ka sngi ba Ar hapoh ka Conference Hall jong u Dy Commissioner ka EJHD ban iakren ha ka jingiadei bad ka jingkwah jong ka NHAI ban plie Tollgate.

Ha kane ka jingialang la wan iashim bynta da ki ki katto katne ki nongialam shnong bad ki dkhot ka KSU EJHD Unit, ha kaba la pyniaid ia ka jingialang da u Additional Deputy Commissioner, Bah G Warjri. Hynrei ym shym la don satia ki ban wan mihkhmat na ka liang ka NHAI.

Kumta na ka liang ka seng bad ki nongialam shnong ki la ieng pyrshah ia katei ka jingthmu jong ka NHAI, kata da kaba ieng skhem ruh ha ka nongrim ba katba ka jingpynbha surok kam pat dep, ka NHAI kam lah ban plie ia katei ka jaka lum khajna.

Na ka liang u Additional Deputy Commissioner ruh u la kular ban phah ia katei ka rai sha ki bor NHAI bad sha ki bor sorkar ba halor.

Shuh shuh ka KSU ka pynpaw ruh ia ka jinglyngngoh namar ka jingnang tharai ba ka sorkar kan khot ban iatai halor ka jingbym shimkhia ka NHAI halor kane ka surok, hynrei kam shym la long kumba la khmih lynti, kata ha  jaka ka surok la iakren pynban ban plie ia ka khyrdop lum khajna.