Ieng pyrshah ka shnong Lapangap ia ka jingdawa ki Karbi ban leit phut ia ki tynrai dieng

Syllad | The Rising MeghalayaSeptember 29, 2023

Ka Dorbar Shnong Lapangap ha ka jingialang dorbar kaba la long mynta ka sngi Thohdieng ka la ieng pyrshah ia ka jingmynjur ki bor synshar district ka West Jaiñtia Hills District ban leit phut noh ia ki tynrai dieng na lum Pynthor kumba la dawa da ki paid Karbi.

Lah ban kdew ba na ka liang ki Karbi ki la kular ban ym pynjulor ia u kba lada shah ba kin leit phut noh ia ki tynrai dieng ba la thung ha Lum Moo Pyrdet Pynthor.

Na ka liang u Waheh shnong ka Lapangap u Bah Deimonmi Lyngdoh u la ong ba ka dorbar shnong ka la rai ban ym ailad ia ki bor synshar district ban leit phut ia ki tynrai dieng namar ka Lum Moo Pyrdet Pynthor ka dei kaba dang hap shapoh u pud u sam jong ka Lapangap.

Ha kajuh ka por la pyntip ba mynta ka sngi ka ophis Basin lyngba ka hukum ba la phah u DC ka West Jaintia Hills ka la hap ban leit phut noh ia baroh 70 hajar ki tynrai ki dieng ba ai da ka MegLIFE project (JICA) ia kiba la thung da ki nongshong shnong ka Lapangap.

Kane ka la wan long ruh hadien ka jingialang hapdeng ki bor District ka West Jaintia Hills bad West Karbi Anglong District kaba la long hynnin ka sngi Palei, ha kaba na ka liang jong ki Karbi ki la byrngem ba lada kim phut ia kitei ki dieng kin pynjulor ia u kba jong ki nong Lapangap bad kumta hi ki la shim ia rai ban leit phut noh ia kitei ki tynrai dieng.