Ieng pyrshah ki 15 shnong ia ka jingthmu ka Sorkar ban pynkylla jaka theh niut ha Nonghali

Syllad | The Rising MeghalayaJuly 7, 2024

Ki khatsan tylli ki shnong hapoh ka lama jong ka Synjuk ki Nongsynshar Shnong Par Umkhen kiba hap hapoh ki latylli ki district jong ka East Khasi Hills, Ri Bhoi bad West Jaintia Hills ki la shim ia ka rai ban ieng pyrshah jur ia ka jingshim rai jong ka Sorkar ban shna ia ka jaka theh niut kaba thymmai ha ka shnong Nonghali, kata kaba jngai tang da ki spah mitar na ka wah Umkhen.

Ia kane ka rai la shim ia ka jingialang paidbah kaba la long hajan ka jingkieng Umkhen ha Thadrang, Ri Bhoi District ha ka 6 tarik Naitung.

Nalor kata kine ki 15 tylli ki shnong ki la shim ruh ia ka rai ban phah da ka jingujor sha ka Khasi Hills Autonomous District Council (KHADC) pyrshah ia ka jingkynnoh pyndonkam bakla ia ka jaka shnong kaba dei ka Ri Raid da u Sordar jong ka shnong Nonghali.

Ia kane ka jingialang la pyniaid da u president ka Synjuk u Bah S Rngaid ha kaba la shim ruh ia ka rai ban dawa na ka sorkar Jylla ba kan pynlong da ka jingbishar paidbah ne ka ‘public hearing’ shwa ban shim ia ka rai kaba khatduh halor kane ka phang ia kaba ki 15 shnong kin shim ruh da ki sienjam kiba tyngeh lada kane kam urlong.

Ki paidbah kiba la poi sha kane ka jingialang ki la pynpaw ia ka jingsngewkhia kaba jur halor ka rai jong ka sorkar ban wanrah ia ka jaka theh niut kaba thymmai ha Lum Sohlait hapoh ka shnong Nonghali namar kane kan pynjaboh ia ka wah Umkhen. Katkum ka jingpynpaw ka jong ki la ong ba kane ka jaka ba la tyrwa ban pynlong jaka theh niut kam don wat tang 100 mitar ka jingjngai na kane ka wah.

Ka sorkar Jylla lyngba ka Tnat Urban Affairs ka la shim ia ka rai ban sdang shna noh shen ia ka jaka theh niut kaba thymmai hapoh Lum Sohlait ha ka shnong Nonghali kaba hap hapoh Mawryngkneng constituency.