Ieng pyrshah ki 15 shnong Shiliang Par Umkhen ba thmu pynlong jaka theh niut ha Nonghali

Syllad | The Rising MeghalayaJanuary 9, 2025

Ki paidbah nongshong shnong jong ki 15 tylli ki shnong kiba don hapoh ka Synjuk Shiliang Par Umkhen bad ki shnong ba marjan ha ka step 9 tarik Kyllalyngkot ki la mih paidbah ha ryngkat ki placard ban khanglad ia ka jingthmu jong ki bor sorkar ban pynlong ia ka jingpynsngew paidbah ne ka public hearing ha ka shnong Nonghali halor ka jingthmu ban wanrah ia ka jaka theh niut ne ka Waste Management Plant ha Lum Sohlait.

Ki heh na ki bor District bad na ka Tnad Meghalaya State Pollution Control Board (MPSCB) ki la shah khanglad ha ki paidbah nongshong shnong ba kin leit sha ka jaka ba thmu ban pynlong ia kane ka public hearing hapdeng ka jingpyrkhing ia ka jingpahara.

Ki paidbah nongshong shnong jong kine ki shnong kiba hap hapoh East Khasi Hills, West Jaintia Hills bad Ri Bhoi District naduh ka sien tyrwa kaba nyngkong ki la dep ban pynpaw ka jingpyrshah kaba jur ha kaba iadei bad ka jingthmu jong ka sorkar jylla ban pynkynriah ia ka marten sha kane ka thain ka jong ki.

U nongialam ka Synjuk ki 15 shnong u la ong, “Kane ka dei ka khubor kaba shai na ki paidbah ka Nonghali bad ki shnong ba marjan sha ka sorkar ba ngin ym shah da lei lei ruh ban wanrah ia ka marten sha kane ka thain ka jong ngi. Kumta ngi aijingmut ia ka sorkar ba ka dei ban pynsangeh mardor ia kane ka jingthmu.”

“Ngi aijingmut ruh ia ka sorkar ba ka dei ban wad da kiwei pat ki jaka kiba biang ki ban ym ktah ia ka koit ka khiah jong ki nongshong shnong kumjuh ia ki tyllong umbam umdih,” u la bynrap.

Hadien kane ka jingpyrshah jong ki paidbah na ka liang ki bor district hapoh ka jingialam i ADC P Passah bad i Presiding Officer na ka bynta ka public hearing i Bah J Umdor ki la hap ban pynsangeh noh ia kane ka jingthmu ka jong ki da kaba kyntu ia ki nongshong shnong ba kin leitphai sha la ki shnong bad ban ia pynbeit halor kane ka bynta khnang ba kin lah ban pynlong da kawei pat ka public hearing.