ILP shi ILP

Banshan LyngdohDecember 30, 2020

Ka aïom jingkhie bhang ka la wanphai biang. Sa shisien ki jingbyrngem ki sawa ha ki lynti syngkien. Sa shisien ki sur ka jingkynad, ka jingbyrthen ban beh ïa ki nongwei, ki ‘dkhar’ shi sngi, ki ïai jlaw mynta. Ki thylliej ding ba thang ïa ki tyngshop jong u Narendra Modi bad u Amit Shah, ki la kham pynkhluid ïa kane tlang. Tangba, katno sngi ne taïew kane ka jingshongshit kan neh? Hato kane kan long biang kum kiwei ki jingïakhih kiba neh tang shipor khlem kano kano ka jingkut kaba thikna? Da ka shu kut noh kumto ruh, kan sa mihpat biang ha kawei ka sngi, bad bun na ngi ngin ïa shad tohhoh da ka jingshongshit ban beh ïa ki mynder lyngba ka Inner Line Permit (ILP). Bun ki nongkyrshan jong ki seng bhalang kin kyriat ïa la ki bniat da ka jingdom, bad lehse kin ong ba nga dei u ïingkhong shyllangmat. Tangba da ngi kyrtiang dien sha ki por kiba la leit noh, ki jingjia ba ha rukom ki sakhi ïa kane.

Ngam da kynmaw bha ïa ki por jong u Bah Bull N. Lyngdoh, u nongïalam sengbhalang ba la pynkhihwin ïa ka Ri Khasi-Jaiñtia ha ki snem 1970 ter ter. Kiba la sakhi ki ong ba ka jingïakhih ka la long kaba shitrhem bha, bad kata ka jingïabeh mynder ka la sdang naduh kito ki por. Tangba nga kynmaw kyndiang ïa ki jingïakhih ha ka por jong u Paul Lyngdoh, u President barim ka KSU, ha u snem 2000 bad 2001. U Paul bad ki paralok ki jong u ki la ïa buh shiphew tylli ki jingdawa bad la ai kyrteng ïa kata ka jingïakhih kum ka ‘Ksan Rngiew Movement’. Ki shiphew tylli ki jingdawa ki kynthup lang ïa ka jingpyntreikam noh ïa ka ILP, tangba ka jingdawa kaba hakhmat eh kadei ban pynkylla noh mar-mar ïa ka ‘Reservation Policy’ lane kata ka aiñ bhah kam jong ka jylla. U Paul bad ki paralok ki jong u ba don ha ka Jaiñtia Students’ Union (JSU) ki la pynpaw ba kata ka aiñ bhah kam ka noh shilliang palat sha ka jaidbynriew Garo, bad la donkam shisha ban pynkylla noh ïa ka khnang ba jaidbynriew Khasi-Pnar kan ïoh jingmyntoi. Ki la khot da ki pakhang shnong bad pakhang ophis, bad kiwei ki jingïakhih kiba la pyndik shisha ïaka im suk-im saiñ. Ki khynnah skul bad khynnah kolej ruh ki la shah paring sha Don Bosco Square ha Laitumkhrah ban dawa ïa kata ka ‘Reservation Policy’ kaba thymmai. Ka jingïakhih ka la khluid tar haduh ba ka ïingsah jong u Myntri Rangbah ha kato ka por, u Bah EK Mawlong, ka la shah lynthem maw namar ba ka sorkar ka jong i ka khlem lah ban pynkylla ïa kata ‘Reservation Policy’.

Tangba, hadien ba la ïaid ar phew tylli ki snem, hadien ba la synshar bun tylli ki sorkar, hato kata ka ‘Reservation Policy’ ka la kylla mo? Hadien ba la pynkhihwin ïa ka shongsuk-shongshngaiñ, hadien ki jingkynthoh ba ha rukom ïa u Bah Mawlong, ka buskit ksiar aïu ba ngi la ïoh? Ha u 1988, u Bah Bull u la shah jied kum u nongmihkhmat. Naduh u 2003, u Paul u la long MLA bad u la long myntri ruh ha ki khat-san snem ba u la shong ha Dorbar Thawaiñ. Hato u la lah mo ban pynurlong ïa kita ki jingdawa ki jong u? Hato ki jinglynñiar ha ki surok bad ki jingkhang dam ïa ki dukan, ki skul, bad jingtehlakam ïa ka ïaid-ka ïeng ki la wanrah jingmyntoi mo? Hato kane kam kdew shai ba ki jingïakhih jong kine ki seng ki long pynban ka jingpynkiew skong jubor ïano re ïano? Hato kam pyni pen ryngkew ba ka suk palat ban ïa dawa da kaba kyang ha surok, tangba ban pynurlong ka dei kaei kaei kaba sohsat?

Te kane ka jingïakhih ban pyntreikam noh ïa ka ‘Inner Line Permit’, ka aiñ ba la dap 147 snem pura, ka la mihpat biang, hynrei la shu bujli tang ki ‘riew ïapom. Mynta ba ki la sngewthuh ba ka shong ha ka sorkar pdeng ban pynurlong ïa kane ka jingdawa, u Myntri Rangbah bad ka kynhun sorkar jylla ki la lah ban ïohthiah suk. Ban kawang maw ïa ka iing u Narendra Modi te ka bym lah ban long, te la shu ïa thang noh ïa ki tyngshop ki jong u. Hato ngin ïoh mo ïa ka ILP da peit bad sngap thuh ïa ki jingkren jong ki ‘riew ba hap ban pyntreikam ïa ka? Da shu sngap ïa ka jingphla jong u Lat ka jylla, u Satyapal Malik, ha ka jingïakren bad u nongthoh khubor jong U Nongsaiñ Hima ha ka 18 Nohprah 2020, u la sait kti halor ka ILP bad u la ong ba ka shong beit ha ka jingïakren hapdeng ka sorkar jylla bad sorkar pdeng. Hato kin ïakren mo? U Amit Shah u la kular ban ïakren hadien ka Krismas 2019 bad u Conrad Sangma halor kane ka mat. Ka Krismas 2020 ka la leit, tangba ka jingïakren ILP pat ka dang sah ha khlaw.

Ki nongmihkhmat bunsien ngi la ïohi ki hap pyndem ha khmat kine ki nongpynkulmar shnong. Te kam long kaei kaei kaba sngewphylla ban ïohi ba baroh ki 60 ngut ki MLA ki la pyndem tdong bad ‘pass’ da ka ‘Resolution’ ban pyntreikam ïa ka ILP ha ka jylla. Ki seng saiñ pyrthei barabor ki hap pynsgewbha ïa ki seng “bhalang” wat la ki sngewthuh bha ïa ki jingeh ki ban sa mih lada leh katba ki ong ki nongpynkulmar shnong. Ka paw shai ba ïa ka ‘resolution’ la shu ‘pass’ da ka jingbymbanse namar ba mynta ki nongmihkhmat jong ka Congress ki la kwah ban pyntreikam da ka Meghalaya Residents’ Safety and Security Act (MRSSA) 2016. U Lat ka jylla ruh u kubur ba ka MRSSA ka la biang pura ban ïa da ïa ngi. Bun ki stad saiñ pyrthei ruh ki batai ba ka ILP da lei lei kam ïahap ban pyntreikam ha ka jylla namar ba kadei ka ‘transit state’ lane ka jylla ba ki nongshong shnong jong kiwei pat ki jylla ki hap ïaid lyngba man la ka sngi.

Kumba long mynta, ki ‘riew paidbah ba im sngi da ka bylla bad ka rep ka riang, ki la shem jingeh shisha. Kat sha ba phai bun tang ki jingeh bad ki jingkutlad khamtam ha une u snem ba lynshop ka klam Covid19. Wat ki nongtrei kam sorkar ruh kim ïoh tulop thikna ba duna pisa palat ha ka jylla. Ki nonghikai skul, ki nongtrei MCCL, ki nongtrei municipal, ki nongtei District Council, baroh ki lynñiar lut. Hato kine ki mat kim dondor se mo ïa kita ki khlur ka ri? Balei kine ki seng kim ïa khih na ka bynta kine ki mat kiba kthah ïa ka shimet bad ki longïing jong ki paradoh parasnam? Balei? Ka jubab ka long da kaba pynkhih ïa ka juh shi ka juh, u mynder un ïai tieng shi ïai tieng. Katba u dang tieng u mynder, ki pla jong ki nonglum bai kynshew na ki mynder ruh kim thylli lano lano ruh. Shisien ba ki mynder kim tieng shuh, ki jingnoh na ki ruh kin sa swai noh. Kata kadei ka jingshisha.

Haba phai pat sha ka jinglong jingman jong ka jylla ka jong ngi bad ka synshar khaddar, ngi lap bun ki jingdkoh. Ki surok, kiba dei ki budlum jong ka roi ka par, ki la nang sator. Hato balei ka tnat PWD kam lah ban shna ïa ki surok kiba neh bun snem? Ki paralok na rilum Garo ki ïathuh ba ka surok na Rongram sha Dadenggre ba la maramot ha u snem 2016 ka neh tang 6 bnai wat hadien ba la pynlut da ki phew lak. Dang shen ka juh ka apot ka jia ïa ka surok Umbir-Mawlyndep. Namar ba ngi dei ka jylla kaba rit bad kyrduh, ngi la dei ban trei bha khnang ban ym syrwa kai ka pisa. Tangba kata kan ym jia lano lano ruh namar ba ka jingïasam doh kyndang kam ju don jingkut.  

Da sngap ïa ki jingkren jong u Lat ba thymmai jong ka jylla, u Satyapal Malik, ngi sngewba u dei u briew uba don ka jingkitkhlieh khamtam na ka bynta u duk u suk. U la leh bun ki kam ba bha ban wanrah jingkylla ha Kashmir bad Ladakh, kiba la duh noh ïa ka jinglong jylla ka jong ki hadien ka sorkar pdeng ka la pynduh noh ïa ka Article 370 ha u 2019, bad mynta la synshar da ka sorkar pdeng ïa ki kum kita ki ‘Union Territory’.  Ka sorkar pdeng ka la dei ban kdup noh ïa ka Meghalaya ruh bad pynduh noh ïa ka jinglong jylla ba pura. Pynlong noh ïa ka Meghalaya kum ka ‘Union Territory’ kaba shiphew jong ka Ri India. Namar ba kat dang tyllun ki por ngim ïohi ïa kita ki sngi kiba phyrnai. Ka juh shi ka juh kat sha ba phai. La i ngiah, la i kdang.