Im syrtok ki nongshong shnong ha khappud Assam Meghalaya

Syllad | The Rising MeghalayaOctober 6, 2019

JOWAI: Ki nongshong shnong ha khappud Meghalaya Assam na Khanduli haduh Lapangap ki hap ban im ka jingim hapdeng ka jingsyrtok wat ha kane ka juk shai namar ba ki dang hap ban ïaid na ki um ki wah bad haka surok kaba khohruh khohram.

Bunsien ki paidbah kiba shong sha kane ka thain ki sahkut ha lynti khamtam haba heh ka umsaw namar bym lait ki kali ban jam shilliang ïaka wah shuwa ban poi ka shnong Lapangap.

Ki paidbah bunsien ki pyndonkam da ki kali pick up ban jam shilliang ïaka wah bad ki kali rit lada ki lait ban jam shilliang ïaka wah ruh, bunsien ki duh haba ïoh ka um ban sam ne rung sha ka engine.

Ka shnong Lapangap ka jngai tang kumba 20 KM na ka shnong Khanduli, hynrei ban leit sha kane ka shnong hap ban ïaid ïaka surok ktieh kaba dap da ki thliew ki syar namar ba lehbymsuidniew ki nongmihkhmat ban shna ïaka surok, kaba dei u shabi jong ka roi ka par.

Ki nongshong shnong jong ka Lapangap kidei kiba im jakpoh naka rep ka riang khamtam u sying, ka thain mula, bad kiwei kiwei, hynrei kane ka shnong kala ieh khunswet haka sorkar jylla.

La sdang ban ot surok ha katei ka thain naduh ki snem 1998, hynrei ka jingïaknieh jaka hapdeng ka Assam bad Meghalaya kala khanglad ïa kine ki shnong ban ïoh ïala ka hok ban roi ban par.

Lada ïoh surok kane ka shnong bun tylli kiwei pat ki shnong ki ïoh jingmyntoi kum ka Chebnai, Pdeintaloo bad Barato.