Im syrtok ki paidbah ba sniew tasam ka surok ha ki 3 constituency ha West Jaintia Hills

Syllad | The Rising MeghalayaSeptember 4, 2022

Ki shnong kiba hap hapoh ki lai tylli ki constituency ha West Jaintia Hills District ki dang hap ban im haka jingim kaba syrtok ban iaid lyngba ka surok kaba khohruh khoh ram wat ha kane ka juk shai mynta.

Kine ki lai tylli ki constituency ki kynthup iaka Nartiang, Mowkaiaw bad ka Raliang.

Ki nongshong shnong ha kine ki lai tylli k constituency kila dawa na ka sorkar ban phaikhmat lem sha ka surok shnong ba pyniasoh sha ka shnong jong ki khnang ba kin ioh ka jingmyntoi kumba ioh lem kiwei hapoh ka jylla.

Ki shnong kiba iakynduh mawsiang na ka jingsniew tasam ka surok ki kynthup iaka Shilliang Myntang, Thangraiñ, Khliehsaniriang, Bhaiñ, Thadsning, Samatan, Thadïalong, Lummuriap, Mobandu, Lathymphu, Umsalang, Musiaw, Thadbamon, Sookhlieh ki shnong kiba hap hapoh ka 4-Mowkaïaw Assembly Constituency. Ka Mynkrem, Khliehriat, Saphohwaïong, longsnieh, Madansynrang, kiba hap hapoh ka 1-Nartiang Constituency, katba ka Nongjngi kaba hap hapoh ka 3-Raliang Assembly Constituency.

U Waheh shnong ka Shilliang Myntang u ma Beristar Lamare ula ong ba ki dap da ka jingsngewkhia bad suhsat haduh katta katta namar ba ka sorkar kala ïehbeiñ ïa kane ka surok da ki phew snem haduh mynta bad kum ki paidbah ki don ka hok ban ïoh ïaka surok kaba bha kumba ïoh lem ïoh lem kiwei ki nongshong shnong jong ka jylla.

Ula ïathuh ba ïa kane ka surok la dep ban siang rong tang shisien haka por ba long MLA bad kum u myntri ka tnad PWD jong ka Sorkar Jylla u (L) Kyrmen Susngi hynrei haduh mynta ïa kane ka surok ym shym la ïoh wat tang shisien ruh ïaka jingmaramot (repairing).

“Kum ki nongshong shnong kiba shong basah ha kane ka dong ka thaiñ ngi mad shibun ki jingeh jingshitom haka leit ka wan ka kit ka bah namar ka jingsniew palat pud jong kane ka surok kaba dap tang ki thliew ki syar naduh na ka shnong Shilliang Myntang kaba jngai 23 Km haduh ban da poi haka shnong Nartiang ka surok kaba pynïasoh shaduh ka shnong Khanduli”, la ong u Ma Wipi Suting Waheh shnong Thadïalong.

Ki la ïathuh ba kane ka surok ka pynïasoh ïa bun tylli ki shnong ban poi sha ki jaka sumar kaba don ha ka shnong Nartiang khamtam eh ïaki longkmie kiba armet ban leit shah sumar ki shem jingeh bha.

Lada leit donkam ha kaba iadei bad ki kam ka ain sha Police Station kaba don ha shnong Nartiang ruh ka shim por ban iabeh bad ki khynnah skul kiba leit pule ha ki skul kiba don ha ka shnong Nartiang, Ummulong, Jowai wat shaduh ka nongbah Shillong bad kiwei kiwei ki jaka kiba hap ban ïaid lyngba kane ka surok kaba khohruh khohram, la ong kine ki nongialam shnong.

Kine ki nongialam shnong kila ong shuh ba ki nongrep nongkhaii ruh ki shem jingeh ban kit ïaki mar rep jong ki kum u sying, u synrai, u synsar bad kiwei kiwei ki mar rep kiba mih na kitei ki thain namar ba sniew tasam ka surok bad kim lah ban pynpoi da kaba suk iaki mar sha ki iew kum ha Nartiang, Iawpynsin kaba don ha ka shnong Wahiajer. Kane ka jingsniew ka surok ka buh jingeh iaki nongrep ha ka jaka ban ioh nong ki duh nong pynban naba ki hap ban siew ka bai kali kaba rem.